Jowai: Ka District Level Inter School Football Tournament (Subroto Cup 2017) kawa pynman da ka District Sports Office, West Jaiñtia Hills District kawa sdang nadooh ka 23 tarik u Naisan da poi ko cha wa kut ynne ka 12 tarik ha madan Kiang Nangbah Stadium, Ladthalaboh.
Ki le tylli ki kyrdan wa da pynman Final ynne ka sngi toh ka Under-17 Girls, Under-14 Boys wa ka Under -17 Boys.
Ha ka Final ka Under-17 Girls da pynman hapyrdi ka Government Girls’ HS School pyrchah ya ka St. Dominic HS School. Ha kani ka yalehke hadooh wa kut i por ym em wa yoh u thap kool kamtæ ha ka yachut Tie-breaker ka Govt. Girls da jop ko da 4-2.
Ha ka kyrdan Under-14 Boys hapyrdi ka Marian Hill Secondary School wa ka Government Boys’ HS School, ka Govt. Boys da jop ko da 2-0. Ya ki kool da thap u Tremiki Lammurong ha ka minit wa 30 wa u Diangheimon Kyndiah ha ka minit wa 59.
Ha ka Under-17 Boys won kawa pynman haprydi ka Little Flower Higher Secondary School, Ummulong pyrchah ya ka North Liberty Higher Secondary School, Jowai; ka North Liberty da jop ko da 1-0 lyngba ka kool wa thap u Sandeep Siangshai ha ka minit wa 33.
Kani ka yalehke da pynman ya ka hapyrdi u slap wa joor nadooh wa sdang hadooh wa kut. Kamtæ ka madan em ko i bynta wa lang um iwa ktah yei rukom lai ka bol. Ha ka kylla step ka yalehke kawa yatoh bor bha heiwa ka bol da hær ko cha wah cha neiñ tangwa ym em wa yoh u thap kool.
Ha ka kylla miet ha ka minit wa le ka North Liberty da yoh ko u thap kool wei hadien ini ka Little Flower da nion ko ya ka North Liberty hadooh wa ka bol da neh ko cha chitieñ madan ka North Liberty wei ka Little Flower da yoh ko ki kattu katni ki laad wow thap kool tang ym em ye ko u pynkylla ki cha ki kool hadooh wa kut i por.
Kini ki le tylli ki dhab kattu daw mihkhmat ki ya ka West Jaiñtia Hills District ha ka Subroto Cup hei kyrdan ka jylla ka wow sdang nadooh ka 2 tarik u July.
Discussion about this post