Jowai: Ki yalehke ka Meghlaya State League (MSL) kiwa pynman ha Jowai, da pteiñ ya ki ynne ka sngi da ki artylli ki yalehke.
Ha ka yalehke wa nyngkong da pynman hapyrdi ka Umladtkhur pyrchah ya ka Jalaphet Lumsachram heiwa ka Jalaphet da jop ko da 4-1.
Umladtkhur ha ka kylla step da thap nyngkong ko ha ka minit wa 14 lyngba u Skhmedrowel Pohshna ha ka minit wa 14 tangwa ka Jalaphet da ye ko u su kylliang ha ka minit wa 40 da ka kool u Waldo Chyrmang.
Ha ka kyllamiet, ka Jalaphet won da thap ko sa le kool ha ka minit wa 69 na u Dap Langstang, ha ka minit wa 75 na u Phrang Pakem wa na u Kiew Bareh ha ka minit wa 90+1.
Ha ka yalehke wa bood won, ka 7 Wasa da jop suk ko ya ka Raliang da 6-1.
Ka kyllastep da man ko ka yong ka Raliang heiwa ha ka minit wa 10 da thap kool u Ejingmut Lyngdoh wei ban joor ka Raliang ka ka 7 Wasa hadooh wa kut ka kyllastep tangwa ym em de yohlaad ko u thap kool.
Ha ka kyllamiet won da man ko mar dei khangtleiñ heiwa ka 7 Wasa da thap ko 6 kool kawa sdang nadooh ka minit wa 52 wa thap u Shining Lamurong, ha ka minit wa 56 da thap u Niwan-O-Gatphoh, ha ka minit wa 65 da thap u Felixson Bang, u Niwan-O-Gatphoh da thap biang u ha ka minit wa 67, u Samehi Ryngki da thap u ha ka minit wa 80 wa u Depok Chetri uwa thap ha ka minit wa 87.
Ha kiwi tawan ki yalehke wa pynman ha Bhoirymbong, Ampati wa ha Mairang. Ka yalehke hapyrdi ka Mawten waka Pyndengrei da kut ko 0-0.
Ka Ampati da pynrem ko ya ka Resu Conventus da 2-0.
Ka Tynrongmawsaw da pynrem ko ya ka Malki da 5-0.
Ka Druma Sandruma da pynrem ko ya ka Warima da 10-0.
Mynstep won ha Jowai, ka Umladtkhur u yachem ko waka 7 Wasa heipor 11 waje i step katwa ka Jalaphet Lumsachram u yachem ko waka Umkiang heipor 2 waje i sngi.
Discussion about this post