Haka lympung yalehbol wa tip kam ka 2nd Shkenpyrsit Secondary School & RMSA Invitation Football Tournament 2021-2022 wada da pynkut ynne ka sngi wa da pynman ha chnong Shkenpyrsit kam chibynta wow pynmih wei pynku yaka yarong poisa ka skur, ka KSU Mupyut Unit da yoh rah ko yei nam jop haka Final deiwa pynrem chi kool yaka Turiap FC Nongtalang.
Ka yalehke da man kawa yoosuk wa kawa ya ryngkat bor bha hapyrdi kini ki arliang wei da pynchongchit leh da ki paidbah wa boon wa da wan wow sakhi, tangwa kat da toh ka bok ka nasib u jop ka KSU Mupyut Unit, da yoh u thap ko chi kool daka Free Kick lyngba u Cherterfall Lyngdoh.
Haka yalang tbian chwa u sdang ka yalehke wada emlang da ki waheh wasian ka chnong kamjooh kiwa chah khut sñiawbha, u MLA ka thaaiñ uwa man leh u Montri kaam pohyung ka sorkar jylla, u Lahkmen Rymbui hawa e yei klam da ong u, i yatylli man ko ka buit ka bor yow jop lut yeiwa mang.
“Ka chnong Shkenpyrsit leh deiwa em ko i yatylli, ye ko u pynyieñ yaka skur wei ka sorkar leh da tipmit ko yaka kam ka RMSA Secondary School najrong wa thung leh ya kiwa sikai”.
Da kyntu u leh wow man ki bru wa burom kylliang heiwa u Blai leh u kyrkhu kyrdoh u khnang wa kiwon kiwon ki kaam hapoh chnong u man ki kiwa jop.
Heiyatoh wa kani ka skur, neiliang u Chairman yong ka u Shmen Kyndait uwa man leh heijooh por kam u Secretary chnong, da khana u wa nyngkong hi i pynman ya kam kani ka lympung toh yow pynmih poisa neibynta u su tulop ya kiwa sikai. Hadien wa tipmit won ka sorkar yaka skur deiwa su tulop haroh ya kiwa sikai, kamtæ da mang ya kiwi tawon ki bynta wa yatoh neibynta i bha i miat kani ka skur, najrong wa i pynkreh yaka yung skur (Building) leh dang lai ko chakhmat.
Ha kani ka sngi da saam leh yei khusnaam cha kiwa jop kamjooh ki wa rem deilang ka song poisa wa T. 2,50,000 (Ar Lak Sanphaw Hajar) cha kiwa jop, katwa T. 1,20,000 (Chi Lak Arphaw Hajar) cha ka liang wa rem.
Da saam leh yei naam Best Player wa da yoh da u Nickson Bina uwa yalehke ka Turiap FC katwa yei naam Best Goalkeeper da yoh u Aibor Suchiang yong ka KSU Unit Mupyut.
