Ka Kyntimon Marwein da jop ko ya ki kynthai katwa u N Pholendro Singh da jop u ya ki chynrang ha ka 3rd Shillong 10K Run, kawa da pynman da ka MSOA hadien ar snem neidaw wa em ka khlam COVID-19.
Da em palat 700 ngut kiwa da chimbynta heiwa da pynkut yei yaphet pyllah ha JN Sports Complex, Polo, Shillong.
Ya kani da pynman kam chibynta ka International Olympic Day wow kynmoo ya ka sngi wa kha ya ka International Olympic Committee ha ka 23-06-1894.
U N Pholendro Singh da jop u deiwa pyndep yei phet heipor wa 32 minit wa 21 second, katwa uwa yoh wa ar u Hepstarly Lyngkhoi da pyndep u 32 minit wa 23 second katwa uwa yoh wa le u Wolbetstar Nongsiej da pyndep u heipor wa 32 minit wa 24 second.
Ha ki kynthai, ka Kyntimon Marwein da pyndep ko deiwa chimpor 41 minit wa 15 second katwa kawa yoh wa ar ka Marqueenless Ramsiej da pyndep ko heipor wa 42 minit wa 20 second katwa kawa yoh wa le kawa man leh chi payu waka Kyntimon ka Bandasharai Marwein da pyndep ko heipor wa 44 minit wa 6 second.
Kiwa jop da yoh ki mar T. 10,000 samen katwa kiwa yoh wa ar da yoh ki T. 7,000 samen wa kiwa yoh wa le da yoh ki T. 5,000 samen. Da e leh T. 1,000 samen cha kiwa yoh wa soo hadooh kiwa yoh wa phra.
Da e khusnaam wa kyrpang ya kiwa da em 50 snem chaneiñ heiwa Kmoin Wahlang kawa da em 74 snem i rta da pyndep ko yei phet heipor wa 57 minit wa 16 second (da chimbynta ko leh ha ka Mumbai Marathon ha u 2019). Da yohchwa ko ya kawa da 54 snem ka Melina Nonglang (1:02:40) wa kawa 55 snem ka Trisina Wanniang (1:05:24).
Ha ki chynrang da e khusnaam cha uwa 57 snem uwa tip kam u Swonding Mawlong uwa da pyndep heipor 40 minit wa 54 second, uwa 50 snem u Badon Singh Tham uwa da pyndep heipor wa 40 minit wa 55 second wa u Pynshngainlang Dkhar uwa 50 snem uwa da pyndep u heipor wa 41 minit wa 25 second.
