Ka 2nd U Adelbert Laloo Memorial Trophy kawa man leh ka 3rd Division Football Tournament ka WJDSA da pteiñ biang ya ka ynne ka sngi da ki le tylli ki yalehke.
Ha ka yalehke wa nyngkong, ka Maitshaphrang Mootyrchiah da jop ko yaka Pateinki Sabah da 1-0 lyngba ka kool wa thap da u Raymon Sten haka minit wa 73.
Ha ka yalehke wa ar won, ka Madankynsaw Mookyndeng da jop ko ya ka Mupliang da 5-2.
Ya ka Mupliang da thap kool da u Emi Ianga Phawa ha ka minit wa 1 wa 76. Ya ka Madankynsaw Mookyndeng da thap da u Cornelius Suchiang haka minit wa 8 wa 39, u Ferdinand Sayoo haka minit wa 12 wa u Dongri Phawa haka minit wa 18 wa 56.
Ha ka yalehke wa le da jop ka Madan Thadmuthlong yaka Tpep Pale da 3-0 lyngba ki kool wa thap u Precious Tang haka minit wa 29 wa 76 wa u Manhok Suchiang haka minit wa 68.
Mynstep ka 12 tarik daw em biang le tylli ki yalehke kiwa hapyrdi ka Khliehshnong Ialong waka Iooksi Youth Welfare heipor 11:00 waje i step, ka Khliehmuchut Shangpung waka Lumkhangdong Kyndontuber heipor 1:00 waje i sngi iwa pynktu da ka Myrjai waka Mawsiang FC Nongkhroh heipor 3:00 waje i sngi.
