Jop ka Manhaka Pakyntein kam ka Lasubon Ksiar, u Salanda Oo Langdoh kam u Paila Ksiar

Ka Women’s Welfare Organisation kam kawi na ki chnat krehkam ka Seiñraij Jowai kawa ya krehlang ha ki bynta waphær waphær yow kyntu kynrong neibynta i bha i miat ha ka imlang sahlang, ha ka 2 tarik uni u bnai da wanrah ko ka rynsan wa kyrpang neibynta ki khon khynroo khyllood deiwa pynman ka yakob Lasubon Ksiar wa u Paila Ksiar 2024 ha yungwalieh ka Panaliar, Jowai.

Kani ka yakob najrong wa man ko kam ka rynsaan u pynku yei sap ki khynroo khyllood, man ko leh chibynta u pynneh pynsah yaka riti dustur nadooh i riam i bait, i ktien thylliej wa kiwi.

Ya kani ka yakob da wan sakhilang da u Montri ka sorkar jylla, u Kyrmen Shylla kam u kongsan uwa da yaroh ya ka WWO wa da pynman ko ya kam kani ka yakob bha chynrang wei miat kynthai.

Da ong u leh wa kani ka rynsan ym du wa yarap ko u pynku ya kiwa mih ha rynsan, tangwa wot ya kiwa em sap hei soor, kiwa em sap hei wow pynmiat dur (Makeup) wa kiwi de.

Hawa e nongmuna yei kyntien Paila Ksiar da ong u, haka juk katni u Paila Ksiar man uwa sy’at dor bha, tang lym pynemkaam næ syndong won ya oo, man u kam u wym em dor. Ini yahaap i thij kam ki khynroo khyllood hi, wa lym bha næ miat i akor salon da man thij kam kitæ ki Paila Ksiar næ Moolangnai wa noh hakhmat ki sniang.

Katwa kamtæ da ong u wa i akor salon man iwa emkaam bha ha ki khynroo.

Heijooh i por leh yaroh u yaka Women’s Welfare Organisation wa lyngba kani ka rynsan wanrah ki i yajan ki khon khynroo khyllood waki manbei ki waheh wasian kamjooh.

Hadien wa dep pynman ki kylla yakob waphær waphær, wa kynthup leh nadooh ka yakob chaad deiwa bhah da ki kynhun, kiwa bichaar da yoobiang ki ya ka Manhaka Pakyntein kawa na Loomiongkjam Jowai u yoh deiñ ko yaka pangsnget kam ka Lasubon Ksiar 2024 wa u Salanda Oo Langdoh kam u Paila Ksiar 2024 uwa na Loomiongkjam.

Kawa jop won hei kyrdan First Runner Up ka Lasubon Ksiar toh ka Ebaitmika Pohleng na ka chnong Ialong, hei First Runner up u Paila Ksiar won da yoh Dakunekiru Lamar na Loomiongkjam.

Hei kyrdan Second Runner Up ka Lasubon Ksiar da yoh ka Sandari Niangti kawa na Iongpiah, yei Second Runner u Paila Ksiar da yoh u Slowly Sumer na ka chnong Mukhla.

Ha kani ka yakob Lasubon Ksiar wa Paila Ksiar da jied leh ya kiwa jop ha ki kyrdan wa khian namo ki Sub Tile waphær waphær kam ka Miat Rben Shñiooh, Miat Jrong Shñiooh, u Miat Rynyieñ, kiwa tip wei pliah chaad naki chynrang wa kynthai.