Ka Mizoram da jop ko ya ka Meghalaya da 2-1 ha ka Final ka U-21 ki chynrang haka yalehbol ka 2nd North East Olympic Games 2022 wa da pynman ynne ha madan Polo, Shillong.
Ka kylla step da kut ko khlem em wa yoh u thap kool tangwa ha ka 54 minit ka kylla miet, u Rohlupuia da thap u ya ka kool wa nyngkong ka Mizoram iwa da pynbood da u Malsawmtluanga ha ka minit wa 80.
Ka Meghalaya da ye ko wow su chi kool ha ka minit wa 87 lyngba u Oresterwell Langshiang tangwa ym ye de ki wow thap biang hadien wa da pyrchang ki wei ki laad wa yoh ki leh da pyndooh noh da uwa yang kool ka Mizoram heiwa da em ki ar tylli kiwa da tikna u psiah.
Ka madan da dap ko da ki hajar ngut kiwa wan paitke kiwa da yang chwa da ki kynta yow yoh Ticket.
Kam wow pynkynmoo wa ha ka Final ki kynthai U-17 da rah da ka Manipur da 4-0 pyrchah ya ka Arunachal Pradesh ynne hi.
Ha kani ka sngi da saam leh ya ki khusnaam ha U-17 Women’s Category wa yoh ka Keisham Melody Chanu ka Manipur (Golden Glove), ka Loktongbam Shelia Devi ka Manipur (Golden Boot), ka Angel Tamang ka Arunachal Pradesh (Player of the Tournament).
Ha ka U-21 Men’s Category da yoh u H Lalrinzuala na Mizoram (Golden Glove), u Joseph Lalvenhima na Mizoram (Golden Boot), u Figo Syndai ka Meghalaya (Player of the Tournament).
Ha ka yalang saam takma da emlang u Montri Rangbah ka Meghalaya, u Conrad K Sangma, u Montri ka chnat Sports and Youth Affairs, u Banteidor Lyngdoh, u Chief Secretary, u Donald P Wahlang wa kiwi de kiwa mihkhmat paidbah.
