Jowai: Ka 5th Chiehruphi Money Prize Knock Out Football Tournament da poi ko cha wakut noh ynne ka sngi 7 tarik, wei da wan pynhaap pyrda yaka da u Minot Sympli uwa da e khublei yaka Club wada ye ko u pynlai bait pynlai ryntih ya kani ka Tournament hadooh wa kut.
Haka yalehke Final da pynman ha pyrdi ka Moosiang Lamare New SC pyrchah yaka Byndihati FC. Heiwa ka Moosiang Lamare da jop ko da 3-0 da ki kool wa thap u Ainguh Syrti haka minit wa 19, u Hanidou Kieye ha ka minit wa 50 wa u Naw Dkhar haka minit wa 65.
Ka Moosiang Lamare New SC da yoh ko yaka song poisa kawa T.120,000 deilang waka trophy, katwa ka liang wa rem da yoh ko yaka song poisa kawa T. 50,000 deilang waka trophy.
Ya i naam Best Player da yoh da u Ainguh Syrti u yong ka Moosiang Lamare, katwa ya i naam Best Goalkeeper da yoh yaka da u Shaiñbor Muksor uwa na ka Moosiang Lamare hi.
Neiliang ka Chiehruphi Social & Youth Welfare Sports Club da e khublei ko ya waroh 32 tylli ki Team kiwa chimbynta lang, wei da e khublei leh ya waroh kiwa wan paitke kiwa wan pynchongchit ya kani ka Tournament nadooh wa sdang hadooh wa kut.
Ka kyrwoh lyngba u Secretary ka Club u Nehlang Bareh.
Discussion about this post