Jowai: Ka Moopala 1st Money Knock Out Football Tournament da poi ko cha wa kut noh ynne ka sngi ka 23 tarik, wei da wan pynhaap pyrda yaka da u Bhamon Shylla, uwa da yaroh yaka Club kawa da ye wow pynman ya kani ka Tournament wei da kyntu u leh yaka Club wa ka chnong wow man ki kiwa ya tylli neibynta wow wanrah yaka roi ka paar hapoh chnong hapoh thaw.
U Dennis Siangshai u waheh chnong ka chnong Mookhep uwa man kam u symbood kongsan, hei klam yong oo da kyntu u yaki paidbah wow ya ksoh kti lang ki neibynta wow yarap uwi ya uwi ha ki Tournament kiwa pynlai da ki chnong lane ki Club.
Haka yalehke Final da pynman hapyrdi ka Nongrim Hills SC Latyrke pyrchah yaka Dkhar SC. Ka Nongrim Hills haka minit kawa 61 da yoh ko wow thap kool lyngba u Hikaimame Bareh wei kani ka kool da neh ko hadooh wa kut i por iwa pynjop yaka Nongrim Hills SC Latyrke.
Ka Nongrim Hills SC Latyrke da yoh ko leh yaka song poisa wa T. 1 lak deilang waka Trophy, katwa ka Dkhar SC kawa rem da yoh ko yaka song poisa wa T. 50,000 deilang waka Trophy.
Ya i naam Best Player da yoh da u Hikaimame Bareh ka Nongrim Hills SC Latyrke, ya i naam Best Goal Keeper da yoh da u Boyme Nongtdu uwa yalehke ka Nongrim Hills SC Latyrke.
Neiliang ka Moopala Social & Cultural Sports Club da e khublei ko ya waroh ki 32 tylli ki Team kiwa wan chimbynta lang. Wei da e khublei leh ya waroh kiwa wan paitke kiwa wan pyn chongchit ya kani ka Tournament nadooh wa sdang hadooh wa kut.
Discussion about this post