Jowai: Ka 1st Inter Office T20 Cricket Tournament wa pynman da ka Meghalaya State Government Employee’s Federation Sports Committee, Jaiñtia Hills Unit, Jowai dang pteiñ ya ki yalehke heiwa ynne ka sngi da pynman ya artylli ki yakhun ha Madan Thymme Lumpyrdi Mihmyntdu.
Nyngkong ka PHE (Electrical) da yachem ko wa ka PHE (Civil). Ka PHE Electrical da jop ya ka kylla khlem wei da jied ko wa kawang bol nyngkong.
Kamtæ ka PHE (Civil) da Bat nyngkong ko wei da yoh ko 132 Run deiwa dooh 10 tylli ki Wicket na ki 20 Over.
Ki Batsman wa da leh bha toh u Hamsorsa Challam uwa kamai 42 Run, u Lakhon Kynjing 25 Run wa u Mewan Challam uwa yoh 21 Run.
Kiwa kawang bol ka PHE (Electrical) kiwa da pynhaap boon Wicket toh u Nibiangmon Sutnga uwa yoh 3 Wicket na ki 4 Over wei da chah kamai u 16 Run, u Heiyoobiangmi Suchiang da yoh u 2 Wicket wei da e u 33 Run na ki 4 Over wa u Pynchemanmi Nartiang uwa yoh 2 Wicket na ki 4 Over wei da yoh na oo 18 Run.
Ka PHE Electrical hawa kdong ya ka thong da jop ko ha ka 19 Over deiwa yoh 133 Run wei da dooh ko 8 Wicket.
Ki Batsman kiwa kamai boon run toh u Wandame Talang uwa yoh 26 Run katwa u Vashni Nongtdu wa u Heiyoobiang Suchiang da yoh ki mar 18 Run.
Ki Bowler ka PHE Civil kiwa da leh bha toh u Lakhon Kynjing uwa pynhaap 3 Wicket na ki 4 Over wei da chah kamai u 39 Run wa u Mardaki Laloo uwa yoh 2 Wicket na ki 4 Over wei da e u 36 Run.
Kamtæ ka PHE (Electrical) da jop ko da 2 Wicket.
Ka yalehke wa bood won da pynman hapyrdi ka WJHD Police pyrchah ya ka MeECL Jowai.
Ka MeECL da jied ko wow Bat nyngkong wei da kamai ko 184 Run deiwa dooh ya 8 tylli ki Wicket na ka 19.3 Over.
Ki Batsman wa yoh boon Run toh u Dame Susngi uwa da kamai 86 Run, u Riki Saioo uwa da yoh 24 Run wa u Lam Gatphoh uwa yoh 14 Run.
Kiwa kawang bol ka Police kiwa da leh bha toh u Sumon Paul uwa da pynhaap 4 Wicket na ki 4 Over wei da yoh 17 Run na oo, u Marshall Pariat uwa yoh chi Wicket na ki 4 Over wei da chah kamai u 21 Run wa u Pradeep Das uwa yoh chi Wicket na ka chi Over wei da e u 9 Run.
Ka WJHD Police won hawa kdong ya ka thong da ye ko u yoh 136 Run wei da dooh ko 9 Wicket na ki 20 Over.
Ki Batsman kiwa leh bha toh u Arki Nikhla uwa kamai 43 Run, u Nayan Hajong uwa da yoh 19 Run wa u Samar Paul uwa yoh 15 Run.
Kiwa kawang bol ka MeECL kiwa leh bha toh u Rocky Lamin uwa pynhaap 3 Wicket na ki 4 Over wei da chah kamai u 20 Run, u Heipor Papeng uwa yoh 2 Wicket na ki 4 Over wei da e u 31 Run wa u Rilangki Sajem uwa yoh chi Wicket na ki 4 Over wei da chah kamai u 18 Run.
Kamtæ ka MeECL da jop ko da 47 Run.
Discussion about this post