Kam chibynta ka Loomkyntoor Music Festival 2024 wa da pynman haka 25 wa 26 tarik uni u bnai ha Loomkyntoor Resort wa em ha chnong Shkenpyrsit, West Jaiñtia Hills District, deiwa chimbynta kiwa tem wa rwai najrong kiwi won ki jait pynwyrngai waphær waphær ya ki paidbah, hei janmiet ka 26 tarik da sdang da ka yakob miat kynthai wa tip kam ka Miss Loomkyntoor 2024, deiwa em 10 ngut ki khyllood wa chimbynta u yakhun ya kani ka naam.
Neiliang u kongsan ha kani sngi, u Awhai Andrew Shullai, MDC hawa klam da yaroh u ya u Teiborlang Hinge u tre kamjooh uwa pynlai ya kani ka yakob wa ye u wow pynman kam kani ka tamasa hapyrdi i eh i khoo i lai luti yong oo tangwa da leh yaleh dohyap bait u wow pynlai bait pynlai ryntih ka.
Neitæ ong u leh, kani man haroh ko kam ka rynsan u kyntu kynrong yei sap ki khon khynroo khyllood ka thaiñ la heiyatoh i tem i put, i rwai i siaw næ yakob miat kynthai, deiwa yooluti leh wa lyngba kani ka rynsan u ye ki khynroo khyllood wow pynwandur ya ka mynried yong ki yow poi cha ka thong.
Hawa khyruiñ won cha ka yakob Miss Loomkyntoor, ki 10 ngut wa chimbynta da pynyoo ki yei sap yong ki lyngba ki kylla riam waphær waphær. Hadien neitæ da jied 5 ngut ki wow psiah hei kyrdan Top-5 wow jubab ki yeijooh i yukylli deiwa thoh ha kot sada dep te puræ won ki yei jubab wa da thoh ki.
Hadien wa kiwa bichar dep ki wow bichaar liang wa nang, da yoobiang ki ya ka Rimika Dkhar wow deiñ ko yaka pangsnget Miss Loomkyntoor 2024.
Yei naam 1st Runner Up da yoh ka Hakani Phawa katwa yei naam 2nd Runner Up won da yoh ka Daphika Thubru.
Da saam leh ya ki Sub Title waphær waphær wa kynthup nadooh ka Miss Popular, Miss Talented, Miss Personality, Miss Congeniality, Miss Ramp Walk, Miss Photogenic, Miss Beauty with Brains wa kiwi kiwi.
Discussion about this post