Jop ka Riwanka Pde ya ka yakob thoh Essay chaphang ka Behdieñkhlam

Hei sien wa nyngkong ka yung krehkaam u Deputy Commissioner, West Jaiñtia Hills da chim ko ya ka laad wow pynman da ka yakob thoh Essay neibynta ki khynnah ki Upper Primary School hadooh Higher Secondary School hajrong ka phang “Behdieñkhlam Festival”. 

Ya kani ka yakob da pynman ha ka 10 tarik uni u bnai ha Kiang Nangbah Government Higher Secondary School, Mynthong, Jowai. 

Ya kiwa jop da pynkup burom ynne ka sngi ha ka yalang wa da pynman ha ka Conference Room, DC Office, Jowai. 

Da ya emlang ha kani ka sngi wa u MLA ka Jowai, u Wailadmiki Shylla, u Deputy Commissioner, u Abhinav Kumar Singh, u F. Passah, Assistant Commissioner, u Dolloi ka Elaka Jowai, u Puramon Kynjing, u President ka Seiñraij Jowai, u H. Toi wa kiwi de.

Neiliang u MLA da e khublei u ya u DC deilang ki bru yong oo wa da pynman ki kam kani ka yakob hei sien wa nyngkong neibhah wa emkaam wow pynman kam kani yow pynyoo yei mahajon ka ri-loom Jaiñtia ha ka riti dustur.  

Related posts

Da yoh ya kiwa kitkaam thymme ka Synjuk Waheh Chnong Ri Jaintia Thadlaskein Block Unit

March 12, 2026

Pyrchah ka JRC ya ka Public Hearing ka TNE Cement yow tih moochuni ha Mynkre

March 12, 2026

Da ban joor u leh yeiwa emkaam u em dei thoh i tar chaphang ka dustur riti yong i, kamtæ da pynchlur wow pynman chooh chooh kam kini ki jait yakob wei da kmen u leh wow yoo yei chimbynta chongchit ki khynnah wei da e u khublei u leh ya waroh kiwa chimbynta. 

Neiliang u DC da ong u wa kani ka yakob thoh Essay toh kawa da e buit da u MLA da ka thong wow pynchlur u thoh deiwa kynmoo ya ka riti dustur kamjooh leh yow pynim yei myllien u thoh u tar deiwa pynemkaam ya ka Behdieñkhlam. 

U DC da ong u leh wa ki bru yong oo deilang ki sahep sorkar da puræ bniah ki ya kini ki Essay wei man ki kiwa da thoh dei miat bha khlem da poi pyrkhat wei ini da man ko i sarong ya ki khynnah ka District wei da yooluti u wa hei yahkhmat u MLA daw yoh u leh kiwi de ki kaam wa boon jait. U DC da e khublei Behdieñkhlam u leh ya u Wailadmiki Shylla kamjooh ya waroh.

Kiwa jop ha kani ka yakob thoh Essay toh ka Riwanka Pde na Government Boys’ Higher Secondary School wei da yoh ko leh ya ka song poisa kawa Rs. 10,000, hei wa ar da yoh ka R. Passah na Kiang Nangbah Government Higher Secondary School deilang ka song posia kawa Rs. 7000 katwa hei wa le da yoh ka Echwadaka Lamurong na St. Mary Mazzarello Girls’ Higher Secondary kawa da yoh Rs. 5000.