Ka Shillong Cricket Association (B) daw yachem ko waka East Garo Hills haka State Final ka Inter District U-19 Boys Cricket Tournament ha ka 2 tarik u Naisan ha Tura.
Ka Shillong Cricket Association (B) ynne da jop ko haka Zone 1 Final ha Khliehtyrchi deiwa jop ya ka All Jaintia Cricket Association da 43 Run.
Ya ka yalehke da hap wow pynman du 15 Over neidaw wa pynthut u slap heiwa ya ka kylla-khlem da jop da ka Shillong Cricket Association (B) kawa da jied wow Bat nyngkong.
Ka Shillong Cricket Association (B) da lai ko wow kamai 128 Run na ki 15 Over deiwa dooh ko 5 Wicket. U Manthan Dey da kamai u 41 Run (5×4, 1×6) na ki 26 bol, katwa u Dipankar Burua won da dat u 28 Run (4×4) na ki 16 bol. U Puraki Shadap Passah wa u Satemitre Bareh yong ka All Jaintia Cricket Association da yoh ki u pynhaap mar 2 Wicket na ki 3 Over.
Ka All Jaintia Cricket Association hawa beh yaka thong da ye ko u kamai du 85 Run na ki 15 Over deiwa dooh ko 6 Wicket. U Saibormiki Passah da kamai u 23 Run (2×4, 2×6) na ki 21 bol, katwa u Chwamiki Ryngkhlem won da kamai u 23 Run (2×4) na ki 34 bol. u Jerimaiah Lyngdoh Kynshi yong ka Shillong Cricket Association (B) da yoh u wow khur 4 Wicket na ki 3 Over.
Yei naam Player of the Match da yoh rah da u Jerimaiah Lyngdoh Kynshi yong ka Shillong Cricket Association (B).
