Shillong: Ka Meghalaya State Olympic Association (MSOA), kam chibynta i lehkmen yaka Olympic Day 2019, da pynman ki ya ka yakob Inter-College Sports Quiz Competition ha U Soso Tham Auditorium ynne ka sngi.
Ka St. Anthony’s College, wa mihkhmat da u Ricarldy Dkhar wa u Roger V Kharbamon, da jop ki ya kani ka Quiz deiwa yoh ki 110 Point, wa ar da yoh ka Synod College kawa yoh 70 Point wa le da yoh ka Women’s College kawa yoh 40 Point.
Waroh da em 6 tylli ki College kiwa chimbynta ha kani ka Quiz kawa da em 11 Round.
Ka East Khasi Hills Deputy Commissioner ka Matsiewdor War Nongbri da man ko kam ka kongsan ha kani ka sngi.
“Ka International Olympic Committee yaleh ko wow chna ya ka pyrthai wa miat wa bha lyngba ka Sport, deiwa ya sñiawthooh yumut lang, i neh chah, i burom kylliang wa i puræ puthi,” da ong ka War Nongbri. “Kam ki khynroo toh u chim phi ya kini ki yurim ka Olympic wei wow lai cha khmat wow embynta wa ki thong ka Olympic.”
Da yaroh ko leh yaka MSOA kawa da lehkmen yaka Olympic Day deiwa pynman ya kani ka Sports Quiz wei yaka yaphet 10km ha kani ka 22 tarik.
“Waroh ki seiñ kiwa tipmit daka MSOA da e lut ki katwa ye yow pynku ya ka Sports hapoh ka jylla wei da mih soh ha ki yalehke hapoh ka ri kamjooh cha baar ri,” da ong ka Nongbri. “Ka India dang ye ko wow e chiboon kiwi yow ye ko u yoh chooh chooh kiwa boon ki Olympic Medal wei lada lai i haka luti wa toh daw poi cha ka thong.
Ha iwi tawon i liang palat 200 ngut daw chimbynta haka yaphet ‘Run for Fun’ wei ya kiwa kwah u chimbynta ye ki u leh ya ini ha yung krehkaam ka MSOA kawa em ha U Tirot Sing Indoor Stadium, Lachumiere.
Discussion about this post