Ka yalehke Basketball wa tip kam ka Inter College Basketball Tournament 2022 wa pynlai daka Thomas Jones Synod College, Jowai kam chibynta i lehkmen yei dap 25 snem, dapoi ko chawa kut ynne ka sngi dei yakhun Final hapyrdi ka Thomas Jones Synod College pyrchah ya ka Kiang Nangbah Government College.
Kani ka lympung yalehke da sdang ko ynnin ka sngi wei ka yakhun Final ynne ka sngi da man kawa chongchit bha neibhah wa kiwa kyrchaan na waroh arliang da ya kbai kyriaw ki wei pyneh-daw ki ya jar jiar ka liang.
Kamtæ hadien ka yakhun, yei naam jop haka kyrdan ki kynthai da yoh rah da ka Kiang Nangbah Government College deiwa pynrem da 29-20 yaka Thomas Jones Synod College.
Haka kyrdan ki chynrang won da rah naam jop da ka Thomas Jones Synod College deiwa pynrem da 51-46 yaka Kiang Nangbah Government College.
U Wailadmiki Shylla, MLA Jowai hawa e yei klam hadien wa sakhi ya kani ka lympung, dap u dei kmen wow yoo ya kiwa chimbynta wa da lehbha ki katwa ye wa lah, heijooh i por wa chim haroh ki ya kam kani ka jait yalehke hawa haka thaaiñ yong i boon rap yabeh ki yei yalehbol.
Kamtæ kyntu u ya kiwa chimbynta u nang lehbha chooh chooh ki chaphrang yow nang ku ki neipor cheipor najrong wa kyntu haroh u wow chimbynta ha kawon kawon ka jait yalehke.
Haka yalang wa pynlai da u M.J. Lamare, Asst. Professor TJSC, da yoh leh i klam na u Principal ka Thomas Jones Synod College, u Dr. D.G. Lyngdoh, naka C. Bapui Asst. Professor TJSC wa kiwi.
