Ka Mahindra Blues Festival kawa da poi cha u lyngkhooh snem wa 10 wa pynman ya kani ka tamasa kawa man ka rynsan kiwa tem wa put ki jait sur Blues, ynnin ka 28 tarik da pynman ko yaka “The Mahindra Blues Band Hunt 2020” ha Mumbai yow jied ya kiwa tem napoh ka ri ki wow yoh u tem ha kani ka tamasa kawa daw wan kiwa tem Blues wa pawnaam na baar ri.
Ha uni u snem yaka Blues Band Hunt 2020 da jop da kiwa tem Blues wa pawnaam ka chnong Jowai kiwa tip kam ki Quiet Storm kiwa daw yoh u tem haka Mahindra Blues Festival kawa daw pynman haka 8 wa 9 tarik u Thohlakhmi (Feb) 2020 ha Mumbai.
Haka 8 tarik daw tem leh u Keb Mo uwa pawnaam hapoh pyrthai kam uwa tem Blues Guitar kamjooh uwa rwai Blues uwa na USA, wei ha kani ka jooh ka sngi daw tem leh ka Kenny Wayne Shepard Band heiwa u Kenny Wayne da sdang pawnaam u kam u Blues Rock Guitarist nadooh wa dang 16 snem u.
Haka 9 tarik daw tem ki Larkin Poe kiwa em arngut ki chi payu ka Rebecca waka Megan Lovell kiwa na Nashville, USA wei da mihpyrtuid (Nominee) ki haka Grammy Award hapoh ka jait tem Contemporary Blues Album Category. Daw tem leh uwi na kiwa pawnaam dooh ki Blues Guitarist na USA uwa da psiah pyrtuid hapoh ka Rock & Roll Hall of Fame heiwa ka Rolling Stone Magazine da booh ko ya oo hei kyrdan wa 23 na ki 100 ngut kiwa chyrkhei dooh wow tem Guitar.
Ki Quiet Storm kiwa na Chutwakhu, Jowai da seiñ ha u Niakhynde (Sep) 2018 wa emlang leh uwa tem Blues Guitarist wa pawnaam ka chnong Jowai kam uwa sdang ya kani ka dhab tem u Starly Chullai (Guitarist/Vocalist), Iandy Mc Son Lynthong (Guitarist/Vocalist), Iakyrdami Nongpluh (Bassist/Vocalist), Maximillian Chullai (Drummer/Vocalist) wa u Samborlang Chyrmang (Drummer).
Ki Quite Storm da ong ki wa da yoh mynsien ki u tem Blues na u BB King, Eric Clapton, Stevie Vaughan, Buddy Guy, John Mayer, Johnny Lang, Koko Taylor, Coco Montaya, Frank Zappa, John Scofield, Roy Buchanan, Albert Collin, Bernard Allison, Allman Brothers wa kiwi kiwi.
Discussion about this post