Ha i lehkmen ya ka Vgyan Sarvatra Pujyate wa National Science Day wa pynman da ka State Council of Science Technology & Environment (SCSTE), Meghalaya, Shillong kawa da poi cha wakut ynne ka sngi ha All Saint Hall, Shillong heiwa da pynkup burom leh ya kiwa yaleh SSLC wa HSSLC ka Meghalaya Board of School Education 2021 Examination kiwa da poi chakhmat wei da pynman ya kani ka lehkmen hajrong ka phang “Integrated Approach in Science and Technology for Sustainable Future” da pynman leh ya kiwa boon ki jait yakob.
Kawi na kini ki yakob toh wow chna ya ki phlim wa tbian namo ka Short Video Competition kawa da dep wow pynman chwa chwa u kut u snem 2021. Ya ka yakob da pynman ha ki ar kyrdan ‘Professional’ wa ‘Amateur’. Ka phang kani ka yakob chna phlim toh “Indigenous Technologies of Meghalaya” kawa da pynman deiwa kyrchaan ka Planning Department ka sorkar Meghalaya.
Kiwa jop ha ka kyrdan Amateur toh u Ashish Jatiani uwa da chna chaphang ki yingkieñ dieñjri wei da e pyrtuid ya ka phlim ‘Living Root Bridge’, yei wa ar da yoh da u Banteilang Syiem uwa da chna chaphang u kre kawa da pyrtuid ‘Millet Story’ katwa ye wa le da yoh u Medarisha Marbaniang uwa da chna phlim chaphang kiwa chna wei thaaiñ tiar kiwa em ha 12 Mer kawa da e pyrtuid ‘12th Mer Craftsmen’. Da saam leh ya ki khusnaam Consolation cha u Mewanshwa Nongrum uwa da chna ya ka phlim wa e pyrtuid ‘Jingkiengjri’, u Kubot Diengdoh uwa da chna ya ka phlim wa e pyrtuid ‘Fly Killer’ wa u Dathewborlang Lyngdoh uwa da chna chaphang i jhep wa da e pyrtuid ‘Garbage’.
Ha ka kyrdan ‘Professional’ da jop da ki dhab u Dr. H.H. Mohrmen wa kynthup lang wa u Habandajop Lyngdoh, ka Melanie Passah wa Nehipaia Phawa kiwa da e pyrtuid ya ka phlim ki ka Eñ Khnam, wa ar da yoh u Sonu K. Sangma uwa da e pyrtuid ya ka phim u ka ‘Jam Nok’ katwa hei wa le da yoh u Nikseng K. Sangma uwa da chna ya ka phlim wa da e pyrtuid u ‘Jhum Cultivation’.
