Hadien wa da pynman yaka yakob chet baam tynre ha ki soo tylli ki chnong kiwa em hapoh ka Block Amlarem, Thadlaskeñ wa Laskeñ yong ka West Jañtia Hills, ka Society for Urban & Rural Empowerment (SURE) da pynman ko yaka yakob chet kawa kiwa jop na kitai ki chnong da wan ki wow yakhieh yei naam jop.
Ka yakob chet baam tynre toh kawa ka SURE da ya krehlang ko ryngkat wa ka North East Slow Food and Agro Biodiversity Society (NESFAS) kawa man leh chibynta ka thong krehkaam namo ka Project wa tip kam ka “No One Shall be Left Behind Initiative” kawa da kyrchaan da ka Rural Electrification Commission.
Ha kani ka yakob wa pynman ynne ka sngi ha Jowai, da wan chimbynta da kiwa jop na ki yakob kiwa da pynman ha ki soo chnong kitæ ha Pynthor, Mukhap, Cham Cham wa Khonglah.
U kongsan ha kani ka sngi u L.D. Lakiang uwa man kam u Waheh Chnong ka Dorbar Chnong Ladthalaboh kamjooh leh u Secretary yong ka Synjuk ki Waheh Chnong ka chnong Jowai, da yaroh u ya iwa boon jait ki baam wei kamjooh leh i bang yong i baam wa da pynkhreh da kiwa chet.
Ha kani ka yakob, da yoh nyngkong da ka Ieidasper Niang wa ka Theijheimon Niang kiwa naka chnong Mukhap. Ya i naam wa ar da yoh ka Lenis Lipon wa ka Phida Dkhar kiwa na ka chnong Pynthor Langteñ katwa yei wa le da yoh da ka Mil Dkhar wa ka Yoona Dkhar kiwa naka chnong Cham Cham, katwa ka Cathleen Khyriem wa ka Enrichetta Liting naka chnong Khonglah da yoh ki yaka Consolation Prize.
