Ka Shillong Cricket Association B da jop ko da chi Innings wa 217 Runs yaka East Khasi Hills haka Inter-District U-23 Men’s Cricket Tournament wa pynman ha Nongpoh ynne ka sngi da ka Meghalaya Cricket Association.
Ki yalehke toh kiwa da pynman plat ar sngi heiwa waroh arliang da e laad yaki wow Bat ki ar Innings. Da em soo tylli ki Group kiwa da yabhah cha ki artylli ki Zone, heiwa ha Nongpoh da pynman yaka Zone 1 wa ha Mendipathar yaka Zone 2.
Haka Zone 1, ka yalehke kawa da kut ynne ka sngi, ka SCA-B da pynkut ko da 385/4 yaka 1st Innings daka Run Rate wa jan poi 7 chi Over na ki 55.3 Over, heiwa u Joydeepan Deb da kamai u 187 na 105 bol, u Mrinal Das (80) wa u Biprodeep Dasgupta (79) kiwa da kamai boon dooh. Katwa na kiwa kawang bol da lehbha u Maialang War 1/34 wa u Shongdor Shangpliang 1/42.
Ka East Khasi Hills hawa e yei jubab da haap lut ki Wicket ko deiwa kamai 75 Run na 28.2 Over, heiwa u Winningstar Khongjoh (14) wa u Muksodul (12) toh kiwa ye u kamai Run. Na kiwa kawang bol, u Aryan Bora da yoh u 6 Wicket deiwa e 11 Run katwa u Aaron Nongrum da yoh u 2/10.
Deiwa tam da 310 Run, ka SCA-B da phah ko wow leh yaka Follow-on heiwa da pynhaap biang yaki Wicket ka EKH da 93 Run na ki 49.3 Over. U Marremdor Kharsati da yoh u 57 Run. Na kiwa kawang bol, u Bora da yoh u 4/31 yow pynkut da 10/42, katwa u Nongrum da yoh u 4/3 heiwa ka SCA-B da jop ko da chi Innings wa 217 Run.
Katwa haka Zone 2, ka North Garo Hills da jop ko yaka South West Khasi Hills da chi Innings wa 169 Run haka yalehke wa kut haka 18 tarik. Yei naam Man-of-the-match da yoh u Success Marak uwa da kamai 118 Run yaka NGH yow pynyoh yei jop.
