U Badonkupar Synnah da pynkmen u ya kiwa kyrchaan ka Meghalaya deiwa jop haka yakhun Welterweight 60-63.5 Kg ynne ka sngi wa ar ka 7th Elite Men’s National Boxing Championship wa da pynman ha SAI Indoor Hall, Shillong.
U Badonkupar da yachem u wa u Roopesh Shukla na Madhya Pradesh wei da jop u deiwa kheiñ Point yow man u uwa nyngkong dooh uwa yakura ka Meghalaya wow lai cha ka kylla wa ar.
Ynne da pynman 78 tylli ki yalehke yakura heiwa uwa yoh Takma Ksiar haka South Asian Games u Sachin uwa mihkhmat yaka Services haka 54-57kg Featherweight da yacmeh u ya u Vishal Kumar na Punjab, heiwa u Sachin da jop u deiwa kheiñ Point.
Uwa yoh Takma Rupa haka 2019 Asian Championship, u Ashish Kumar na Himachal Pradesh da yachem u wa u Kingson uwa na Manipor haka Featherweight heiwa u Kumar da jop u.
Kiwi de kiwa yakura ka Meghalaya kiwa da yakhun ynne toh u Kordor Marwein haka Lightweight 57-60 Kg tangwa da rem u ha u Aditya Nagar uwa na Uttar Pradesh hadien wa u Referee da pynsangeh u ya ka yakhun pyn haka Round wa nyngkong hadien wa uwa yalehke ka UP da pynhær u ya ki kura wa boon tylli hadooh wym ye de u Kordor u leh iyi iyi.
Haka 48-51 Kg Flyweight, u Khrawbok Marwein da yachem u wa uwa yalehke ka Bihar, u Shiv Kant. U Khrawbok da chah bok u hadooh wa oor tangwa da ye u wow yieñ wow yakhun biang tangwa da rem noh u deiwa kheiñ Point.
Discussion about this post