Shillong: U MP wa thymme ka Meghalaya cha Rajya Sabha, u Dr. WR Kharlukhi da ong u wa daw pyrchang katwa ye yow chakri yaki paidbah ka jylla katkam i bor wa da pynkup ha oo.
Hawa kylli hajrong ka Citizenship Amendment Act (CAA), da ong u wa kam uwa mihkhmat haka dorbar Parliament, u yieñ u ha i jooh ka yurim waka sorkar Meghalaya deiwa dawa wym pynkrehkaam hapoh ka jylla ya kani ka aiñ, wei daw booddien ya kani ka phang wow pyntikna waka jylla ym chah kynthup ko haka CAA.
Da ong chooh chooh u wa kamwa da pynkhamkti ha oo ya i kaam, hanla man ko ka sien wa nyngkong, tangwa u pyrchang katwa ye wow krehkaam katkam wa da yooluti ki paidbah.
Haka yung dorbar wa em 60 ngut ki MLA, u Dr. WR Kharlukhi da jop u ya kani ka Election deiwa pynrem ya u kyrtong ka Congress, u Kennedy C Khyriem deiwa yoh 39 Vote na ki MLA wa em haka sorkar synrop Meghalaya Democratic Alliance (MDA), katwa u kyrtong ka Congress da yoh u 19 Vote na ki MLA ka Congress, kawi ka Vote khlem kheiñ yaka (Invalid) wa u MLA ka KHNAM na North Shillong ym em lai chimbynta u ha kani ka Election.
Kajiak chaphang u Dr. WR Kharlukhi
Ya u Dr. WR Kharlukhi da kha haka 27 tarik Khonchonglad (Nov) 1956 ha Jowai wei da pyndep u ya i puræ puthi ha St. Mary’s Mazzerello wa ha Government Higher Secondary School, Jowai, hadien wa pyndep u ya i puræ College na St. Anthony’s College, Shillong, ya i kyrdan Post Graduate Degree wa Master of Philosophy in History, kamjooh yaka Doctorate of Philosophy in Political Science da pyndep u na North Eastern Hill University, Shillong.
Ha u snem 1984 da man u leh kam u Lecturer ha Synod College, hadien kamwa 20 snem wa da chakri kam uwa sikai, da man u leh u Head of Department of History, wei da chongngiah u na i kaam kam u Associate Professor ha Thohlakhmi (Feb) 2017.
Ha u snem 1986, da psiah u cha ka Hill People’s Union kam u dkhot hapoh i yahkhmat u (L) Prof. B. Pakem. Da chah jied u kam u General Secretary ka Hill People’s Union Youth Wing, wei da krehlang u wa u B.M. Lanong, uwa man u President ka Hill People’s Union Youth Wing ha u snem 1990.
Ha u snem 1997, ka Hill People’s Union deilang wa kiwa piah na ka Hill State People’s Democratic Party hapoh i yahkhmat u (L) E.K. Mawlong da seiñ ki yaka United Democratic Party (UDP), tangwa da mih noh u naka UDP ha u snem 1999. Ha u Naiynniaw yong u snem 1999, hapoh i yahkhmat u (L) P. A. Sangma da psiah u cha ka Nationalist Congress Party wei da ksoh u kam u President ka Nationalist Congress Party, Meghalaya State Unit nadooh u snem 2007-2012.
Ha u Naisaphra 2012 da seiñ yaka National People’s Party deilang wa u (L) P.A. Sangma, u Dr. Kharlukhi da mih noh u naka Nationalist Congress Party wow chna yaka National People’s Party, wei nadooh itai i por da chimti kum u President ka National People’s Party, State Unit Meghalaya hadooh kini ki sngi.
