U Lat ka Meghalaya uwa pait leh ya ka Arunachal Pradesh, u Brig. (Dr.) B D Mishra (Retd) da saam u ya ki khusnaam cha kiwa jop ha ka yakob phet pyllah wa tip kam ka 2nd Half Marathon wa pynman da ka Assam Rifles kam chibynta i lehkmen ya ka “Azadi ka Amrit Mahotsav” ynnin ka 6 tarik ha Headquarters ka Directorate General Assam Rifles, Laitkor, Shillong.
Najrong i lehkmen yei dap 75 snem i yoh laitlooid ka ri, ki bru yong ka, ki dustur riti wa ki moomær ka ri; kani ka Half Marathon man ko leh kam chibynta ka “Fit India Movement” wei kani ka yaphet da man ko neibynta ki chynrang wa kynthai kiwa da yabhah da jar jiar i rta wei ka phang pyrdi kani ka yakob toh leh wow pynyoo yei mynsien yatylli.
Da chimbynta leh ha kani ka yakob da ki chipai wa kiwa ha-yung ha-sem ki Assam Rifles, Army, Air Force, CRPF, CISF, SSB, BSF wa Meghalaya Police.
Da chimbynta leh da kiwa phet wa pawnaam ka Meghalaya Olympic Association yow e reiñ pyrchah ya ki chipai. Ki le tylli ki kyrdan yaphet toh ka 21 Km, 10 Km wa 5 Km wei ha kini ki kyrdan da yabhah da jar jiar ki rta. Waroh da em 303 ngut kiwa chimbynta ha ka yaphet 21 Km, 512 ngut ha ka 10 Km wa 224 ngut ha ki 5 Km. Da em leh ki khynnah kiwa dang 5 snem kiwa da chimbynta.
Kiwa jop ha ka 21 Km toh u Emphius Nongrum waka Darisha Langjuh ha ka rta 21-30 snem; u Suvisje wa Lt Col Shreya Rawat ha ka 31-40 snem; u Comdt Pramod Kumar waka Aarti Yadav ha ka 41-50 snem; Col Eben Simeon waka Beena Venkatesh ha ka 50 snem chaneiñ; u Lt Gen PC Nair, AVSM, YSM, PhD, DG Assam Rifles da chimbynta u ha ka 50 snem chaneiñ hei yaphet 21 Km.
