Jowai: Ka Chutwakhu Social Welfare Local Dorbar, Jowai kam wow pteiñ ya ki kaam wow pynchlur ya ki khynroo khyllood yong ka wow pynyoo ki yei sap yong ki lyngba ka Arts & Cultural Committee da pynman biang ko ha uni u snem kawa man leh ka sien wa ar hadien u snem wa da dep ya ka “Teenagers of the year” ka rynsaan ya kiwa em hapoh 20 snem chynrang wa kynthai wow pynyoo yei sap yong ki kawa man leh kam ka yakob miat kynthai bha chynrang.
Ha ka yalang wa tbian wa pynman chwa wow sdang ya ka yakob Teenagers of the year, u Chiarman ka Arts & Culture Committee u HWD Passah da pyntip u wa ha uni u snem neibynta ki khynroo khyllood da dep pynman ya ki yakob wa ha rukom kam ka yakob dro, yakob rwai pyllah, yakob chaad, yakob chondur yow e laad ya ki khynroo khyllood wow pynlut ki yei por ha ki kaam wa ka-it ki kam ha kini ki por wa boon kiwa phon wow lai cha ki luti wa bakla.
U kongsan ha kani ka sngi u DM Wallang, ADC ka WJH hei klam yong oo da ong u wa ha kini ki sngi ya ki khynroo khyllood boon kiwa ieñ wa yang ya ki kam ka dih drugs wa kiwi ki jait dih pynmuaid kamtæ emkaam ya ki manbei manpa wow pynbiang ym du ya ka tnoom yung wow thiah tangwa iwa kor dooh toh wow pynbiang ya ki ya ka manyung kiwa em por wow pynlut u chong wow yaklam wa ki yow lait ki u lai cha ki luti wa bakla.
Hawa kyruiñ won cha ka yakob Teenagers of the year da pynman ya ka neibynta ki chynrang wa kynthai ha ki le kylla ka Traditional Round, ka Victoria’s Secret Round waka Evening Wear Round kawa da wan chimbynta 29 ngut chynrang wa kynthai.
Hawa kut kiwa bichaar da jied ki neiliang ki chynrang ya u Shanborlang Chullai kam uwa jop, wa ar da yoh u Wanlangki Sutnga wa leh da yoh u Ebenezer Pohsna.
Neiliang ki kynthai da jop ka Elizian Dkhar, wa ar da yoh ka Zamia Tariang wa leh ka Tanisha Rymbai.
Da saam leh ya khusnaam kiwa jop ya ka Best Traditional kawa jop da u Damanghi Dkhar waka Zamia Tariang.
Yei naam Best Personality da yoh u Shanborlang Chullai waka Elisian Dkhar.
Da e leh ya i naam Healthy Skin kawa da yoh da u Daphrang Sutnga waka Tanisha Rymbai.
Ha kani ka sngi da saam leh ya ki khusnaam cha kiwa da leh bha ha ka puræ puthi yong ki wei da yoh leh ya ki chaad ki rwai na ki dkhot ka chnong.
Discussion about this post