Ka Jaiñtia Students’ Movement (JSM) Central Body, haka khubor wa da phah da u Publicity Secretary yong ka u Deijuhhi Siangshai da ong u waka seiñ dap ko dei sñiawsih wei sñiawphylla hadien wa yoo ko wa ka yung krehkaam u Deputy Commissioner ka East Jaiñtia Hills District da pynbna ko cha ki laad pathai khubor wa ong wa ki paidbah yong ka District hap u pynsakhiat ki kam kiwa chong chnong deiwa paan yaki Certificate na u MLA lane naki sahep sorkar.
Ya ini u Deputy Commissioner da pyntip u cha ki paidbah wa chondur yow yaleh Aadhaar Card.
Heiyatoh wa ini, ka JSM da kylli ko yaka yung krehkaam u Deputy Commissioner ka East Jaiñtia Hills wa ileh waroh chi kattu wym pu tip ki mo ya i bor yong ki waheh chnong næ ka Dorbar Chnong wa da tipmit leh da ka aiñ sorkar lyngba ka aiñ synchaar chnong ka Jaiñtia Hills Autonomous District Council kawa hapoh ka kyndon 31(11) da batai che bha ya i bor krehkaam ki waheh chnong.
Kamtæ ka seiñ da ong ko wa i rukom leh ka sorkar lyngba ka u DC da pyrchang ki u thoohlaad u pyndooh ya i bor synchaar chnong synchaar thaw ki Dorbar Chnong wei ym ye u pdiang ya ini.
Ka seiñ da kylli ko wa sakhiat mo ki MLA wa ki sahep sorkar kiwa ye u pynsakhiat yei man tre chnong? Katkam wa da jooh leh da chem wa kiwon kiwon ki kaam pynroi pynpaar næ kiwi kiwi ki kaam ka sorkar da paan ko yei pynsakhiat næ i pynche lyngba u waheh chnong tangwa sñiawphylla katwa ha u Aadhaar hap pyntip næ pyntikna wa mantre chnong da ki MLA næ sahep sorkar.
Kamtæ ka seiñ da kyntu ko yaka yung krehkaam u Deputy Commissioner ka East Jaiñtia wow sñiawbha wow pynbna deiwi deiwa pynskem yaka Residential Certificate ki Dorbar Chnong/Waheh Chnong wei lada ym pynbait, pynyoo wa da tyngkheiñ yaka aiñ ka JHADC.
