Ka Dorbar Chnong Ialong da pynsñiaw ko yei lyngngoh yei pynche ka Dorbar Chnong Pasyih ha ka 12 tarik uni u bnai ha u Wyrta heiyatoh wa i kam pood ka Ialong heiwa neiliang ka Ialong da ong ko wa da pynlyngngoh leh wot ya ki bor wa ha khlieh dooh yong ka Elaka deiwa ong kamni ha wah.
Neiyi i daw wa mih i kyntien “Elaka“? Hei sakhiat ka Elaka ha ka burom yong i kam ki jaitbru Pnar kiwa dang ksoh ya ka riti synchaar hadooh kini ki sngi man ko ka kyntien chongsbai yong ki beipun tymmen kiwa stat wa chemphang wow pynkup bor ya uwa ha khliehdooh ha ka bichaar ka khadar ha ka Elaka yong kiwa boon ki chnong neibynta wow wanrah i chongsuk chongsaiñ wa ki para marjan Elaka, chnong heiyatoh wa ki thaw ki bhaw, u pood u ang næ ki khyndaw ki chyiap katkam ka riti synchaar wa kiwi kiwi.
Hei sakhiat kani ka jyrwit jyrwat hapyrdi ka chnong Ialong wa ka chnong Pasyih man ko kawa da sahteiñ da ki phaw snem wa chadien. Ha kini ki phaw snem wa chadien, hadien wa da yoo wa man ko iwa tkoh hei wow ya pynbait para waheh chnong i wym poi cheiwon cheiwon leh, ki ar waheh chnong iwa mut ka chnong Ialong wa ka chnong Pasyih da rai ki wow e noh wow bichaar da ka Elaka wa khliehdooh da u Pa Dolloi, Elaka Jowai wei wa kini ki ar waheh chnong da khlai ki leh ya u thylliej ksiar u yong ki deiwa ong ha kti yong ka Elaka wow poi ka rai wei toh u man ko kawa khaddooh.
Tangwa hadien wa da mih ka rai na ka Disciplinary Bench yong ka Elaka Jowai deiwa bhah katkam ki Landmark ha ka Notification na ka yung krehkaam u Pa Dolloi, Elaka Jowai ha ki snem wa dadep neibynta ka chnong Ialong da kdaw hadooh chrooh yung ka Rajasthan Hotel.
Neiliang yong ka Dorbar Chnong Ialong da jubab wei pdiang ko katkam ka rai yong ka Elaka katkam wa da e kti da ki waheh chnong. Tangwa ka chnong Pasyih won kat hadooh ynne da palat ya ki snem ym pu yoh yei jubab, ini pynyoo ko wym burom de ko ya ka rai wa da u khliehdooh yong ka Elaka katkam wa da e kti da u waheh chnong u yong ka. Weiwa sñiaw phylla won wow sñiaw wa ka chnong Pasyih paya wym em burom ko ya ka Elaka katkam ki thylliej ksiar yong ka kiwa dadep khlai hachwa wow e kti cha u Pa Dolloi.
Ini man i iwa sakhiat heiwa ka Dorbar Chnong Ialong da kdaw ko katkam ki Landmark wa da e kti cha ka da ka Disciplinary Bench yong ka Elaka ha u snem wa da dep.
Toh hi iwa da ong ka chnong Pasyih ha ka kyrwoh wa da man sakhiat iwa pynklumar ya ki marjan pood khamtam ya ka Elaka kawa da dooh thiah ha ki por wa da lai chadien neibynta wow bichaar bniah kamjooh wow wanrah ya ka chnong suk chong saiñ ha kini ki thaw wa ya kajia (Disputed Areas).
Ka Dorbar Chnong Ialong da pynche chooh chooh ko heiyatoh wa u pood u ang yong ka iwa da tip nadooh ki warim wa jah nadooh Lad Pasyih Petrol Pump u Jimmy ter ter chadooh Bihsyntu Soomer katkam i ya pynbait ki waheh deilang wa ki sakhi satar ha ki por wa chadien wot hadooh katni.
Hao ye u pdiang weiwa sñiawsuk wow sñiaw ya ki kyntien ksiar yong ka chnong Pasyih deiwa ong wym jooh kam ko ya u pood u ang yong ki para marjan chnong.
Lada toh kam i ktien wa i kaam, dap dei sñiawkmen tangwa iwi donhi i yukylli khlem da pynbaad iwi yei wi, iyi mut “Lad Pasyih”.
Hawa ong Lad Pasyih iwa mut ka lad lane ka luti ka wow psiah chapoh ka chnong Pasyih.
Katwa kamtæ sñiawbha ap da ki chkoor pait da ki khmat yei yumut wa khian tam khnang yow lait na i sñiawthooh bakla.
Iyi sñiawthooh ka chnong Pasyih hawa pynmih ya ka khubor ha u Wyrta, lym toh sakhiat i pynklumar ya ki paidbah khamtam ya ka Elaka.
Yoh boi wym em u puræ bniah ki ya ka Notification wa da yoh pdiang na ki bor wa ha khliehdooh yong ka Elaka.
Wei ileh ka Dorbar Chnong Ialong kdaw ko yow pood u yong ka toh ka rai wa thymme yong ka Elaka wa khliehdooh da u Pa Dalloi deiwa burom.
Neitæ i daw kdaw ka Dorbar Chnong Ialong, kdaw ko du kat na Rajasthan Hotel neidaw wa burom ya ki bor wa ha khlieh yong ka Elaka, meitæ ya u pood warim tam ka chnong Ialong toh nadooh Lad Pasyih.
Lada ini i pynche yong ka Dorbar Chnong Ialong man ko kawa bakla neibynta ka chnong Pasyih tæ mut wa ka rai yong ka Elaka leh ye u man kawa bakla.
Hei sakhiat kini ki ar chnong toh u sñiawngooh ki ya ka Elaka kawa da pynthanda ya ki kynrum kynram heiyatoh wa u pood deiwa bhah ya ki Landmark neibynta ki ar chnong khnang yow neh i bha i miat yong ki.
Ka Dorbar Chnong Ialong mar sien yoh ya ka Notification na ka Elaka heiyatoh wa u pood da jubab wut wut dei pdiang wei mynjur yei rai yong ka Elaka khnang yow smat ka chong suk chong saiñ wow wan ha kini ki thaw wa kajia khnang yow neh i suk i saiñ.
Tangwa kat hadooh ynne ka sngi ka Dorbar Chnong Pasyih um tip yi mut ko iwa chadien neibynta ka chong suk chong saiñ ha ka yurim yong u pood hawa pynmih ya ka khubor.
Lada ka chnong Pasyih sakhiat kwah ko wow ya krehlang neibynta i chong suk chongsaiñ wa ki para marjan chnong heiyatoh wa u pood u ang, da kyrpaad ya phi wow mih chakhmat wei wow jubab ya ka rai yong ka Elaka wym toh du kat hei kam chah, khnang yow man sakhiat ka parom wow sah khana neibynta ki pateiñ wa daw wan ha ka chong suk chong saiñ.
I pynche man ko leh ka “Clear Definition” naka Dorbar Chnong Ialong cha ka chnong Pasyih.
Puræ leh: Pynche ka Dorbar Chnong Pasyih yei kam pood ka chnong Ialong
