U Montri Rangbah ka jylla, u Conrad Kongal Sangma da jubab u ya u National Vice President ka Bharatiya Janata Party (BJP), u M Chuba Ao uwa da pynbaad wa ki seiñ saiñpyrthai ka jylla da lai khrong poisa ki da ka Bowl na Delhi.
U Conrad uwa man leh u National President ka National People’s Party (NPP) da ong u wa i klam yong u Ao da pynhiar dor ko ya ki bru yong oo hi, wei ym tip u iyi i daw wa pynman ya uwa yahkhmat ka ka BJP wow klam ya kitai ki kyntien.
Da ong u wa uwa yahkhmat ka BJP leh toh uwa na na kani ka thaaiñ North East, wei tip bha u ya ki rukom krehkaam ha kani ka thaaiñ, heiwa da pynrap u wa kiwa boon na i ya i yarap poisa ha ka jylla toh bait na ka sorkar pyrdi.
Ha ka 20 tarik uni u bnai, u Chuba Ao da pynbaad u wa ki seiñ saiñpyrthai yong ka jylla Meghalaya kiwa man kam ki seiñ wa heh næ kiwa da tipmit ha ka ri, katwa i rukom pyrkhat won man du kam ki seiñ ri-loom kiwa lai rah Bowl wow lai khrong na Delhi.
U Montri Rangbah da ong u leh wa man iwa bakla wow pynbaad wa ka jylla ym em pynkrehkaam hok ko ya ka poisa wa da yoh naka sorkar pyrdi wei da ong u wa u Ao toh u lai pait hi u dei khmat iyi wa ka sorkar da leh ko wei toh u klam u yeiwa sakhiat.
