Ka Mawlai Town Dorbar hadien wa da yaklam wei hadien wa da ya phyllu yumut wa ki muktiar wa da rangbah ka jylla, da chem ki wa u Montri Rangbah ka jylla ye u wow pyndam kreh chipor ya ki 2 ngut ki pulit IPS, wei ya ini ye u wow leh deiwa ya syllok wei kynjoh ktien wa ka Ministry of Home Affairs.
Hawa klam hadien ka yalang ka MTD, u President yong ka u SD Khongwir da pyntip u wa ka Mawlai Town Dorbar ka khlem chong klikti ko hajrong i jia wa da mih ha Mawlai ha ka 13 tarik uni u bnai. Da ong u wa ka Mawlai Town Dorbar ka booh ko leh yei kylli ya u Montri Rangbah ileh wym ye u wow pyndam kreh chwa ya ki pulit wa emkti wow siat yap ya uwa yahkhmat warim ka HNLC.
Da ong u wa u Montri Rangbah da em u ya kiwa e buit wow pynyoo wa em ki kyndon wa u Montri Rangbah ye u wow leh, wa i bor wow pyndam kreh ya ki pulit næ ki sahep ka sorkar pyrdi lada chah pynbaad ki wa leh ya ki kaam pyrchah aiñ.
Da ong u wa katni ym em de iwon iwon i daw wa u Montri Rangbah ym ye u wow pyndam kaam ya ki 2 ngut ki pulit, næ wow ong wa ini toh i wym toh, tangwa lada ong u wa ini toh i wym toh, neiliang ka MTD ka smat ko wow yatai nia næ wow pynche.
Hawa yatoh wa em ka kynhun ‘Ka Sur ki Nong Mawlai’ kawa da pynbna wow pynjoor ya i yakhih, u President ka MTD da ong u wa ki Waheh Chnong ym pynwit ki ya kiwon kiwon ki kaam wa leh lada ym pynthut i ya i suk i saaiñ wa i chong chngaaiñ ki paidbah.
