Ka Supreme Court ka ri India ynne da tynyap ko yaka bichaar wa da pynmih ha u snem 1998 kawa da e hok ya kiwa mihkhmat paidbah nadooh ki MLA wa MP wow lait ki nei chah pynchitom hawa baam tangka yow klam wei yow kyrchaan namo ka Vote ki ya iyi iyi hapoh ka yung dorbar.
U Chief Justice ka India, u DY Chandrachud, da ong u wa i baam tangka ymtoh iwa ye u pdiang. Wei ya kani ka rai da pynbna langa da ki 7 ngut kiwa bichaar deilang wa u Chief Justice.
U Chief Justice da ong u leh wa dadep ki wow bichaar ha waroh ki liang wa lada ki MP ki MLA toh kiwa yoh yada naka aiñ tangwa ym ye wow mynjur wa em ki kam kani ka hok.
Ha u snem 1998 da pynmih yaka rai da ka Supreme Court wa ki MP wa MLA toh kiwa yoh yada lada baam tangka ki yow klam hapoh dorbar wei wow e ya ka Vote ki hapoh ka dorbar tangwa ynne won ka Supreme Court da ong ko wa ini i hok ymtoh iwa da e hapoh ka Article 105(2) wa 194(2) ka Constitution ka ri heiyatoh wa i baam tangka hanla kini ki kyndon yada ki ya kiwa mihkhmat paidbah naka aiñ yow ye ki u kreh khlem da tieñ.
U Chief Justice da ong u leh wa chah ktah ha kiwa boon ki liang deiwa baam tangka.
Kam wow kdaw heini, ka sorkar u Prime Minister warim ka ri, u PV Narasimha Rao da ngat ko ha ka No Confidence Motion ha u Naiynñiaw 1993 tangwa da lait ko nei haap hadien wa yoh ko 265 tylli ki Vote wa kyrchaan wa 251 tylli Vote wa pyrchah.
Ha snem wa bood da mih ka khubor wa ki MP ka Jharkhand Mukti Morcha da baam tangka ki yow kyrchaan yaka sorkar u PV Narasimha Rao. Kamtæ ha u snem 1998, ka Supreme Court da pynmih ko yaka rai wa ki MLA wa MP yoh ki yei yada naka aiñ yeiwa klam ki kamjooh ka Vote wa da e ki hapoh ka dorbar chna aiñ.
Discussion about this post