Da u Riquoma Rq. Laloo
Du wakieh ka Bom kieh ka Bhuri,
Mynsien wasya, yow poi ki Leyaw Soosngi;
Yow yoh u chaad, u kynthih deiwa kmen,
Kam ka hukum, wow Kynrad u yachem.
Ka Hukum u Kynrad, yow Ñiaw Wasa,
Khmat bru kattu, wym yachem de mi wa nga;
Ha ka Suit ka Choor, ha ka Ngooh ka Dem,
I wymdam de O u wan, toh chisien chisnem.
“U e mi ya nga, ka Chaad ka Kmen,
Deiwa Khooid Mynsien, ymtoh ka chaad Ku-iyang;
Chaad hajrong ka Moo, ka Dieñ, næ i thaw wa jakhlia tam,
Heitæ Nga wa Hun i Mon Hun i Mynsien”
Diaw wan i mynsien, howni u snem,
Khon ka Niamtre waroh dei yamrem;
Wymyoh u chaad, tang wymtoh wa leh chynnam,
Yong watne ryngkhat, pyrthai waroh em khlam.
Pyrthai ya awri yeibhah ka Khlam COVID,
Lehniam Behdieñkhlam, wym emhi u wit;
Ngooh lang chirup, yow beh ka chajngai,
Wymtoh du neini, na waroh hi ka pyrthai.
Nadooh u Wisu, Pa Daloi da yahkhmat,
Ki Kñia ki Khriam, ka Trong ka Thmat;
Din pa din, top pa top, u bood u lai;
Wymhun du ki bru, sa ki Chuar ki Blai.
Hamdooh kyrmen, yei kyrkhu yong u Kynrad,
Wymdooh hi iki, han lymyoh i’u chaad;
Kaam Niam leh waroh, ye u pyndep kamwa jooh,
Ha chnong næ ha yung, yaleh i’u pynphooh.
U Kñi wa ka Kchu ka Siang, boonkaam i yarap kylliang,
Yow poi noh ka Pynsiñ, pyndep Chyllap Chylliang;
Yoh ki Warim wajah, ki Sangia, u wanrap u wandiang,
Yei pynkhreh pynkhrum, wa da pyntoh pynbiang.
Wym em hi eh de, ka rah Dieñsæh dieñchaan,
Wymhoi u tyngkheiñ i, ya ka Social Distance;
Rahbom, wachoh, waput kiwa chaad leh deilang,
Kat wymye u ya jngai, ya kitai waroh pyndam.
Ka Sngi ki Khonraij, ka sngi wa nyngkong,
Kam ka nia ka khot, ka sngi rah ya ka Khnong,
Yeini da pyndam chwa, howni hi eh u snem,
Du ka Ngooh ka dem, Khonraij wei yamrem.
Ham ong, wa em wakhang, u yachaad Behdieñkhlam,
I mon i khe samen, yow syndong jar jar i pran;
U bood aiñ sorkar, wymtoh du i ha Jwai,
Yow lait neipoor u COVID chityllup i pyrthai.
Ha ka Mulong leh ijooh, Kñia Aitnar u pyndep;
Dieñsæh dieñchaan ki chnong, kitæ waroh pynpep,
Ka Ngooh ka Dem u em, ha waroh ki thaw pynchong,
Paan map now Kynrad, hawa pyndep Hukum Adong.
Ka step Musiang wan, ha Myngkoi Pyrdi,
Kamwa jooh man khlieh snem, katu daw emhi;
Wymyoh hi eh u yalai ki paidbah na ki chnong;
Wow mih ngoohblai cha yaw, kitu kiwa dajied don.
Ha ki chnong ki thaw jar jar, ye ki u e i ngooh i dem,
Yow pynchkæh ya i Maiñ, yong u Loom yong u Pdeiñ,
Yow ye u khang u kah, ya kawa pakhet ka kjut chitom,
I chait i tram u yoh, khon ka Dong næ ka Chnong.
Ha ka Step Muchai, kaamram ka Loompyrdi Ïongpiah,
U mih na Yungwalieh, cha yung riblai yung Langdoh;
Yeini leh pyndam chwa, yow lait na i ya chlong,
Du kiwa dajied don, khlem em ka Kyntiñ Khnong.
U pynbood wan, ki chnong, ki thaw, ki Loom, ki Pdeiñ;
Na Yungwalieh yong ki, da ka Ngooh ka Dem;
Neitæ cha ki Thyndai Yung, ki khon yong ka chnong,
Li Ngooh li suit li choor, da ki nia u pynthiah pynchong.
Ki Rot, ki Rong ki rup, dei yamrem wym em ki waroh,
Weilai hur hur her her, yong ki kynthai khynnah;
Tangwa Sñawsuk don waroh, dep niam waroh salonsar,
U pynkut ya ka chaad ka kmen, kamwajooh ha ka Syiem Aitnar.
Ha Syiem Aitnar wan, nongyalam chnong wa ki Waheh Wasan,
Li ngooh li dem hi ki, tang wymtoh dei chaad kamwa jooh man;
Neibynta ki khon ka chnong, la em ki heiwon heiwon,
Li pajrait um kiwa dajied, yow kit ko ya waroh ka chnong.
Daw emhi ka Dat Lwakor ha pyrdi u Sangot wow Langdoh,
Wym ya kûnjat yaphet yaphar, du ha kti don u ksoh;
Yow e wan ki how Daloi, wa yathaiñ ka yaleh yong ki,
Yow bha u Kba u Khoo ha ki pyn-ar pynthor hi.
Pynkut ka lehniam, da ka Yutang u Kñi Raij wow Langdoh,
U em ka Bam Tyngkong ki wakreh Niam hi waroh;
Wymchah ya ki paidbah, u yawan yamih yalai,
U ya syndong hi waroh nowni u Kjut ka Pyrthai.
Yamrem bait i Sñiaw, ki Khon ka Niamtre;
Howni chooh u snem, kamwa Thmu, wymyoh de;
Han la kattæ ileh, to’n kmen i ha mynsien,
Kaam Niam waroh dadep, wym em u ieh i chadien.
Behdieñkhlam Wakmen, u snem wow Sahkhana,
U Snem Wasih ka pyrthai, nei em u Corona;
To’n ya snohktilang i, yow ye u pyndooh pyndam,
Khlem da kheiñ ya ka Niam, Waroh u yakrehlang.
