Ka Behdieñkhlam kawa man kawi na ki lehniam wa kongsan tam yong ki khon ka Niamtre ym du wa beh ko ya ka khlam wa i sih i roi wa har rukom tangwa wanrah ko leh ya i yatylli wa i maya hapyrdi iwi ya iwi.
Kamwa da jooh sakhi khlieh u snem ki Khonraij wa ki Kmairaij kam ynne ka sngi Mulong da lai thooh ki ya ki Dieñkhlam wa ka Khnong Blai.
Ha uni u snem leh hadien wa pynmih ya ki Dieñkhlam na khloo cha sarok wei da pynchong ya ki chipor harood sarok khnang wow ye u pteiñ ya ki.
Ha ini i por kam wow chong-ngiah, ki chynrang da ya sai ki jar i yusong wow baamja lang chirup khlem i sñiaw yaphær lada hei kur wa hei chnong khnang wow baam ja chirup heiwa da sakhi wa da tyrwa yei ty’æ ya kiwi ki lok yow maad kat khon wa yoh hanlada chi kham chi troh samen da hun i mynsien.
Dep neini da ya yieñ tylli chirup khnang wow ye u kit u rah ya ka Dieñkhlam wa ka Khnong Blai dei kyrkhu u Trekirot hadooh wa poi i thaw pynthiah pynchong ya ki.
