Jowai : Ka Seiñ Raij Tuber ynne ka 5 tarik da pykut ko ya ka Chaad Sukra 2016 wa sdang nadooh ynnin ka 4 tarik. Ya kani ka Chaad Sukra da pynkut ha khmat ka Khloo Blai ka chnong Tuber hei emlang ka kong M. W. Nongbri kawa man kam ka Director, Arts & Culture Department ka sorkar jylla kam ka kongsan wa u ma L.S. Shylla u Chairman ka JHADC Jowai, u ma L. Rymbai, MDC ka thaiñ wa kiwa heh wa sian ka raij wa ki paidbah.
Kani ka Chaad Sukra toh ka sien wa ar wa ka Raij Tuber da ye ko u pyllang ya waroh ki chnong hapoh yong ka wa em hadooh 28 tylli yow ya pynman kawi donhi ka Chaad Sukra. Nachwa ki chnong jooh pynman ki jar jiar ki Chaad Sukra.
Ha ka 4 tarik ka Raij da dep ki u pynman ki yakop wa boon jait yow pynim biang ya ki stad yongrim kam ka yakop thaiñ kriah thaiñ chylliah thaiñ star, ka put bhuri pyllah, pdiah Sitar, pdiah Duitara wa ka yasiat thong.
Ynne da yoh leh yei klam naka kong Solani Bareh kawa pynkynmoo ya ki khon ka Ñiamtre khamtam ya ki khynroo khyllood yow jied kurim deiwa ym hoi u chah pynbiej du ha i maya lada wan tyrwa da u dohlieh dohyong toh u pyrkhat ki leh ya i kiwa khian paaid. Kamjooh leh da kdaw ko ya ki manbei manpa wa ki toh u bah khlieh ya i man i long ki khon ki, toh u pyllait por khnang yow yoh por ki u sneiñ u kroo ya ki khon ki khamtaam ha kani ka juk wa im i katni.
Ha kani ka sngi da kynmo warom leh ya u Woh Tep Kyndait u Khlawait ka Tuber uwa yieñ pyrchah ya u Syiem Jaiñtia heipor wa e u ya ka hukum kawa phah kylla Hindu ya waroh ki khon ka Ñiamtre wei da chah tynyap u ha u syiem ha ka 17.01.1669 yeini i pyrcha u ya oo. Ha kani ka miet leh da leh ya ka drama hei yatoh wa i rukom im u woh Tep Kyndait.
Da pynchongchit ya ki spah ngut kiwa wan cha kani ka Chaad Sukra da ki rukom chaad wa boon jait kam ka Chaad Pastieh, Chaad Kyllaiñ Kti, Chaad Dien Khyrwait Hati wa kiwi na ki chnong ka Raij Tuber.
Discussion about this post