Jowai : U ma T. Bareh uwa jooh man (retired) Range Forest Offier Jowai, WJH ha ka chithi da ong u wa waroh ki Department næ ki seiñbhalang lehwarom ki jar jiar ki sngi ha uni u bnai ya ka bei rymaw tangwa man ko ka kaam chi sngi katkam wa chem wa yoo u.
Da ong u “ki Department waphær waphær ki seiñbhalang ki skur pyllut ki ya ka poisa khlem iwon iwon iwon i myntoi. Katkam wa chem O heipor wa dang kreh o hadooh wa chong ngiah man ki du kam ki kaam chi sngi donhi”.
Da ong u leh wa hawa leh ya kiwon kiwon ki Programme wow pynneh pynsah ya ka rymaw boonsien man ki du chi sngi, wow baam ja wei u thung dieñ kamwa yoo ha ki kot khubor ha kini ki sngi. Ym jooh em won wa sumaar ya kiwa da dep thung katkam ka rukom wa toh, neibhah hawa kha khonboo emkaam u sumaar i ki hadooh wa heh wa san ki wei du kattu katni heh wa ye sakhiat u pyndep ya ini i kaam.
“Neibhah itæ i daw kyntu o ya waroh kiwa chim bynta ha uni u snem 2016 wow sumaar bha ki ya ki tre dieñ hadooh wa heh ki khnang wow man ki kam ka laad wow yada deiwa pura ya ka Bei Rymaw. Ymtoh du wow pynmih kot khubor wa da thung 1000, 500, 200, 100, tylli ki tre dieñ katwa ka Survival Percentage won Nill” da ong chooh chooh u ma Bareh.
Discussion about this post