Ka Mawlai Town Dorbar (MTD) da pynche ko kdar wa waroh ki kyrtong ki wow yakhun ya ka MDC Election cha KHADC wa dadep mynjur lang ki yei rai tangwa lada em kiwa kwah wow leh da kamwi, itæ chong ha ki.
U Chairman ka Mawlai Town Dorbar u Herlambor War hawa klam cha ki laad pathai khubor ynne ka sngi, da pynche u wa katkam ka yalang hapyrdi ka MTD wa waroh ki kyrtong ki wow yakhun na Mawlai Constituency, da rai wow pynman bait du da ka rynsan yalap Election ya waroh ki kyrtong kawa tip kam ka Common Platform khnang wow lait nei pynwit pynthut ya kiwa yaleh Exam khamtam ka Metric.
Hawa yaklam wa kiwa thoh khubor ryngkat kiwa synraan lang kiwa kitkaam ka MTD, u Chairman da khana u wa waroh ki kyrtong ki wow yakhun u e ki yei klam ha ka Common Platform wa pynbait ka chnong, wei yeiwa emkaam waroh daw pynbiang ka chnong nadooh ki tanghæng, i pynbna paidbah wei ki kyrtong ye ki u e katwa kwah ki ya ka bai pynsawa.
Tangwa u Chairman ka MTD da pynsñiaw u yei sñiawsih wa em kawi ka Party kawa da thmu wow pynsñiawthooh bakla ya ki paidbah wa ka Mawlai Town Dorbar da khang ko wow yalap Election. Da ong u wa ka Mawlai Town Dorbar ym em khang laad ko ya kiwon kiwon wow yalap Election wei ym em bor ko wow khang, tangwa lada ki kyrtong kwah ki wow leh deiwi yeiwa dadep rai lang, chong ha ki.
Da ong u wa da mynjurlang wa waroh ki kyrtong wow em da ka Common Platform ha waroh ki chnong kiwa haap ha ka Mawlai Town Dorbar, khnang wow lait na iwon iwon i wit ya kiwa pynkhreh wow yaleh Exam wei yow lait nei sahkut kari.
Wei sa iwi leh wa yow suk kiwa chong chnong wow wan ap ha kawi ka thaw wei yow lait leh u boon ki bru kiwa na baar chnong.
Kam wow kdaw heini wa ka seiñ Voice of the People Party (VPP) neiliang u Batskhem Myrboh kam uwa e ktien ka Party, da ong u ha ka Social Media wa pyrchah u yei rai yong ka Mawlai Town Dorbar deiwa ong wa ym ye ko wow khanglaad wow yalap Election.
Discussion about this post