Jowai: U montri ka tnat kaam pohyung ka jylla u, James K. Sangma ynne ka sngi da sdang u ya ka yalap Election neibynta ka By-election ha Ampati Constituency, South West Garo Hills deiwa ong wa ka sorkar jylla wa yahkhmat da ka NPP u neh ko hadooh wa kut ka samoi neibhah ki paidbah ka Meghalaya da e ki i chaniah ya ka NPP wa ki Party wa krehlang wa ka.
Da wai u leh ya ka yungkrehkaam wa thymme ka party wa em ha Latri, kawa haap hapoh ka Ampati Constituency heiwa da em ka ka yalang kiwa kreh ka Party chirup wa u kyrtong yong ka u Clement G. Momin kamjooh leh kiwa kitkaam ka party wa kynthup ya u State Working President ka NPP, u S. B. Sangma.
Hawa paan yei kyrchaan na ki paidbah ka Ampati, u James K. Sangma da ong u wa ka Congress yaleh ko wow yah bakla ya ki paidbah deiwa ong wa kani ka sorkar kawa katni ym neh ko palat ya ka ynru bnai.
Da ong u wa ka Congress da sdang piah ko deiwa e nongmuna ya ka election kawa dang dep man ha Williamnagar Constituency.
Chooh chooh da ong u wa hapoh ka Congress ym em de i yatylli deiwa kyrmen wa ki paidbah daw kyntait ki ya ki kaam wa thok yong ka Congress deiwa ong leh wa boon ki dkhot ka Congress daw pyrchah ki pyn ya ka kyrtong yong ki.
Da kyntu u ya ki paidbah wow kyntait ya ka Congress wa ya u Dr. Mukul Sangma, uwa da chukor ya ka Constituency deiwa ieh ya ka neibynta i myntoi samen yong oo.
Da ong u wa ki paidbah ka jylla kyrmen ki ha ka NPP wa ya u montri rangbah ka jylla u Conrad K. Sangma, uwa em i angnood wow pynman ya ka jylla kawa thymme.
“Du hapoh chi bnai hadien wa chna ya ka sorkar, u Conrad K. Sangma da ye u wow pynhun ya ka sorkar pyrdi wow pyllait T. 150 klur neibynta kiwa sikai SSA yeiwa ka sorkar warim ym ye ko u leh,” da ong chooh chooh u James K. Sangma.
Discussion about this post