U S. Osborne Kharjana uwa da chong ngiah kam u sahep ka chnat Custom da ong u wa ha kawon kawon ka Party i piah daw em i, tangwa da em biang leh i ya sñiawthooh yumut, wei kamwa man katni, ka Congress ka em ko hapyrdi i pynkylla thymme, kamwa da emkaam waroh wow pynkylla thymme ya kiwa yahkhmat ka jylla.
Da ong u wa hei yong sakhiat da pyrchang u wow yakhun ya ka Election naka United Democratic Party (UDP), tangwa u Blai da wai luti u wow lai cha ka Congress, heiwa da chem u toh ka Party kawa em yaka yurim wei kawa da ye wow wanrah yei chongsuk chong chngaaiñ hapyrdi ki jaitbru.
Da ong u wa ka thong wa da booh toh wow pynbha yei puræ puthi, i chait i khiah wa ka aiñ ka wow yarap ya ki warep. Da ong u wa lada yoh yei jop, katwa ye u pyrchang u wow wanrah yei kylla ya kitai ki Policy.
Hawa kylli yei sñiawskem wei wow yakhun pyrchah ya u MLA warim, u HDR Lyngdoh wa ya u MLA wa katni, u Samlin Malngiang, u Osborne da ong u wa kiwa yahkhmat warim da em ki i rukom pyrkhat wa rim, wei lada ki paidbah kwah ki wow yoh thymme, hap ki wow pynmih ya kiwa yahkhmat wa thymme, deiwa pynrap wa ym tip u lada daw suk lane i jynjar wow yakhun pyrchah ya ki, tangwa i thmu wa da mih ha ka Election toh neibynta ka ri waka jaitbru wei chong ha ki paidbah lada yoo biang ki.
U Osborne uwa man leh u khon yong u MLA warim, u Nit Shabong (1983-1988) da ong u leh wa ka rai wow psiah cha ka saiñpyrthai toh neidaw wa da yoo u yei duna ha ka synchaar khadar kawa da wanrah yei sñiaw sarom ya oo, deiwa pynrap chooh chooh wa sñiawsih dooh toh wym yoo ya kitæ kiwa mihkhmat wow man kam kiwa chna aiñ.
