Uwa yahkhmat ka National People’s Party (NPP) uwa man leh u Symbood Montri Rangbah ka jylla, u Prestone Tynsong da ong u wa ka Congress toh ka yung ka sem kawa da piah, deiwa ong wa ym ye ki wow pynbait du ya ka kaam President ka MPCC, wot hawa u President wa katni ym kwah de u wow dang yahkhmat ya ka Party ha kani ka jylla, kawa da pynman ya u heh ka AICC wow wan cha kani ka jylla.
Da ong u wa ka Congress ym ym toh du kawa da piah ha kani ka Jylla, tangwa wot nadooh Delhi, ka AICC ym ye ko wow yoh ya u President wa pura. Da ong u wa wot tang ya ka kaam yung wa khian leh ka Congress ym ye ko wow pynbait iwa pynyoo che wa toh ka yung ka sem kawa piah wa pra.
Hawa kylli, da ong u wa hadooh katni ym pu em wa yoh yutip wa em ki MLA ka Congress kiwa da pynsñiaw wow yabi wa ka NPP, deiwa ong leh wa lada ka Congress ka tyrwa ko ya oo wow man kam u Montri Rangbah leh ym bien de u wow liwan, neibhah wa ym em mih u du neibynta wow yoh ya katai ka chuki.
Hawa kylli chooh chooh, u Prestone da ong u wa ka MDA daw yoh ko wow synchaar sa palat 10 snem, neibhah hadien u snem 2023 wa 2028 Election leh, ka MDA daw yoh ko wow synchaar ha ka jylla.
