U Lamphang ka Yung Dorbar Chna Aiñ yong ka jylla, u Thomas A Sangma da pyntip u wa ka Business Advisory Committee (BAC) da mynjur ko ya ka Dorbar Mang Tangka kawa 8 sngi wei u sdang ko nadooh ka 20 tarik uni u bnai.
Katkam wa ong u Thomas, ki dkhot ha ka BAC da rai ki wa ha kani ka dorbar wa 8 sngi daw wanrah ya ka mang tangka kawa pura yong ka jylla, heiwa da ong u wa ki chnat krehkaam ka sorkar toh u pynbiang ki ya waroh ki yukheiñ kiwa yatoh wa i pynlut pynsep waroh.
Hawa kylli hajrong i pynman dorbar wa du 8 sngi, u Thomas da ong u wa lada emkaam wow pynyinsur ya ka daw chim ya ka rai wa emkaam kam u Lamphang.
Da ong chooh chooh u wa i pynman ya ka dorbar wa du 8 sngi toh wa hadien wa da pynduna noh ya ki Private Member Bills deiwa e laad wow yaklam du 2 sngi, ya kawa daw e laad wow yania biang ha ka dorbar wow bood.
Ha iwi i liang u Lamphang da pyntip u leh wa i jied ya u Symbood Lamphang yong ka Yung Dorbar Chna Aiñ daw pynman ha ka sngi sdang yong kani ka dorbar.
