Jowai : Ka e dawai wa tip kam ka Intensified Diarrhea Control Fortnight (IDCF) yow yada ya ki khynnah wa hapoh 5 snem i rta neibhah boon kiwa dooh yei mynsien na ka kjut Diarrhea (Pynhiar kpoh) da sdang ya ka ynne ka sngi ha ka chnong Wahiajier.
Ya kani ka IDCF u pynman ya ka ar tayaw na ka 11 tarik uni u bnai hadooh 23 tarik ha kani ka chnong heiwa ki wa kreh ka tnat Health kam ki ASHA, ANM wa ki Doctor daw yachem ki ya waroh ki manyung wa em ki khon ki wa yoh pynhiar wei daw e dawai mynkna ya ki da ki ORS wa u dawai Zinc.
Ha kani ka sngi da pynyoo cha ki paidbah wa em ha ka yalang wa pynman ha Wahiajier Community Hall wa kammon u khleh ya u ORS da ka nurse S. Shylla kawa batai che cha waroh wa emkaam chwa u sait ya ki kti chwa u pynkhreh ya u ORS wei ya uni u ORS toh u khleh ya oo wa ka um wa da dep chet kawa em chi liter.
Hadien ini leh toh u pyndih sa u dawai kuli wa tip kam u Zinc uwa ye u tylliat ya oo wei khleh wa i dud ne chirup wa u ORS.
Yow sñiawthooh ki paidbah ya ki daw wa mih kani ka kjut pynhiar ki khynnah ka Bosco Pnar da pynman ko ya ka lehke wa tbian (skit) kawa pynyoo cha ki paidbah yeidaw wa poor ini i kjut du neidaw ka leh tngit ki bru heiwa baam ki khlem sait kti, dih ya ka um khlem chet chwa wa i lai paikhana cha loom cha wa wah. Ki khniang kjut Diarrhea kiwa em ha i ait won da rah ya ki cha ki yung ki bru da ki mrad kam ki miaw ki ksaw wa ki phare.
Yei emkaam u chna ya ki paikhana kiwa ka sorkar katni da yarap poisa ko na ka Scheme Swachh Bharat u K. Lyngdoh u Block Coordinator kamjooh leh u Master Trainer ka Swachh Bharat Mission da pynche chooh chooh u ya ki paidbah yei emkaam u pynemkaam ya ki paikhana kiwa da chna wei ymthoh u pynman ya ki kam ki trep booh tiar.
Da ong chooh chooh u wa haap u pynmyllien ya ki khynnah u pynemkaam ki ya i paikhana kamjooh ya ki tymmen yow lait u poor kani ka kjut pynhiar.
Discussion about this post