Jowai: Ka Khasi Students’ Union-Jaiñtia Hills District Unit haka 26 tarik u Naisaphra da pynman ko ya ka yachemlang ki dkhot na ki Unit waphær waphær ka ri-loom Jaiñtia yow ya sñiawthooh hajrong 4 tylli ki phang heiwa ya kani ka yachemlang da tip kam ka “Mynta sha ka Lashai”.
Ya kani ka yachemlang da pynman ha Conference Hall ka GHM Guest House, wei i pyrtuid ya kani ka prokram “Mynta sha ka Lashai” toh ka thong wa iwon iwon wa yaklam næ leh ka seiñ iwa katni u man ko kawa myntoi yaka ri ka jaitbru hadien.
Ha kani ka yalang da pynche ya ki 4 tylli ki phang wa kynthup ya 1. History & Constitution wa yatoh wa ki paidbah 2. Kammon u thoh Memorandum wa ki Press Release 3. Trading License, Labour License Entry Exit Point wa ki aiñ ka JHADC wa yatoh wa ki baar jylla 4. Ka Jaitbru Khasi (Ynñniawtrep) wa i sniawthooh bakla wa ki Jaiñtia.
Ya ka yalang da pynlai da u Benison Kamar Organizing Secretary KSU Jaintia Hills, da yoh ya i klam pdiangburom na u Ohibait Dkhar President KSU-JHDU hei emlang ki dkhot ka seiñ KSU Central Body Shillong natlor ki bru chemphang.
U Erick Kharjana uwa jooh ksoh kam u Office Secretary ka KSU Central Body da e u i batai pynche hei yatoh waka riti krehkaam ka seiñ KSU, heijooh i por leh da khana u wa kammon ka KSU sdang ko u man doh man snam hapoh ka bri u Ynñiawtrep. I daw wa kongsan hi toh hadien wa yoo yei emkaam sakhiat u em ka dhab ki khynroo khyllood puræ wow yakhih neibynta i puræ puthi hapoh ka Jylla. Neitæ da khana haroh u yei eh wa ka seiñ chem ko hei lai luti wei da kyntu u ya ki dkhot u man ki kiwa leh khian wa kiwa yaichah yow ye u lai chaphrang.
Hei yatoh i batai wa kammon i rukom thoh Memorandum wa ka Press release, u Donald Thabah uwa man General Secretary KSU Central Body Shillong ong u, ha ka juk katni i e yutip lyngba i thoh man iwa emkam bha neibhah pynkynmoo ko wei man ko leh kam ka sabut ymtoh kam iwa klam heh dei ktien. Katwa ka Press Release won toh kawa kongsan tam wa lada bakla pyllait khubor khajak u ktah ko yei dur i rynyieñ ka seiñ, wei ye u jia iyi iyi. Da kyntu u ya ki dkhot wa hachwa u e khubor toh u yachem ya sñiatwthooh yumut lang waroh ki EC ka seiñ ymhoi u leh samen arngut donhi.
Hajrong ka phang Trading License & Labour License da yoh i batai pynche na u Ianly Nongrum Advocate, heiwa nyngkong da batai u chaphang ka Sixth Schedule kawa e bor yaka district council wow chna ya ki aiñ wei u pynman aiñ hei yatoh wa ki rukom man tre neibynta u yada yaka jaitbru ha kiwa boon rukom wa kynthup leh i wan psiah kulmar ki bar jylla. Neitæ won da batai u hajrong i emkaam ki bar jylla u yoh License naka District Council chwa u sdang ki ya iwon iwon i khih lada toh i yong samen namo Company neibhah da em ka aiñ, kamjooh da batai u kammon ye ki u yoh ya ki Trading License waka Labour License.
Neiliang u president warim ka KSU Central Body u Daniel Khyriem da klam u hei yatoh waka jaitbru Ynñiawtrep Khasi, heiwa nyngkong kyruiñ u wa kammon sdang ka KSU hapoh Jaiñtia Hills wei ki yi i chah tynjooh wa maad ki chwa u lai luti ki chaphrang, kamjooh kammon man ki wa yahkhmat ka KSU haki por nachwa hadoh wa kam ka Central Body haap duk ki u pynsniawthooh ya ki. Chooh chooh da khana u yei lai luti ka KSU ha kiwa boon ki kaam wa yaleh ha ki snem wa da lai.
Da ong u leh wa lada yaklam ya ka Ynñiawtrep toh kynthup nadooh u Khynriam, u Pnar, u Bhoi, u War, u Lyngam, u Diko waroh toh u em i sñiaw wa i toh iwi donhi ka jaitbru. Kamtæ kam ka jaitbru wa du chitroh donhi lada yapra i, ur wot ko, lada yatylli won i ym em i eh u ku i chakhmat neipor cheipor.
Discussion about this post