Jowai : Ka Discover Jaiñtia 2016 ynne i sngi da pynman ya ka ha Sniriang Tuber Kmaichnong heiwa da yoh ki paibah u sakhi yei pynhær ‘Paragliding’ wa ka ‘Paraplane’.
Ya ka Paragliding da wan da ki bru napoh Gangtok, Sikkim. Kini ki bru da pynher ki ya ka Parachute ki na kyndian u loom deiwa pyhiar won ya ka cha ka pynthor wa em ha wah uni u loom. Da pyrchang leh u pynhær sa kawi ka Parachute kawa rap heh kamjooh kawa ye u kit arngut tangwa hap pyndam noh hadien wa ym em biang ka lyær ha ini i thaw.
Hei yaklam wa kiwa pynhær ya kini ki parachute da ong ki wa cha Sikkim da pynhær ki ya kini ki parachute ha ki ar kyrdan. Kawi toh ka ‘Medium Flight’ wa em kamwa 5 hadooh 8 minit nadooh wa her hadooh wa poi biang ha kyndaw wei da chim dor T. 2,500. Ya ka ‘Long Flight’ wa yoh ki bru u chong hadooh 15 minit wei da kheiñ dor T. 5,000.
Da wan leh ka seiñ East Jaintia Adventure and Motorsport Association (EJAMSA) na Sutnga East Jaintia Hills.
Kani ka seiñ da wanrah ko ya ka Paraplane næ ka Parachute wa pyndait ha ka kari wa em ka kor wa skit (propeller) kawa ye u kit arngut ki bru. Ya kani da pynhær na madan Lyngkeiñ, Ialong. Ya kini pynar daw pynher biang mynstep ka 27 tarik ha Ialong Park.
Ha kani ka sngi da khut ya kani ka sngi kam ka East Jaintia Cultural Extravaganza kam chi bynta wow pynyoo wa ka District East Jaintia Hills ka em ko boon ki thaw wa u pynman kam ki ‘Tourist Spot’ ym du u Mooyong donhi.
Ki dkhot ka JTES wa pynman ya ka Discover Jaiñtia da ong wa ha kini ki 10 snem wa dadep pyntip ki cha ka pyrthai ya kiwa boon ki thaw lai uiñkesawari wei kamjooh leh da sdang ki paibah u pdiang ya ka ‘Tourism’ kam ka laad kamai.
Ha kani ka sngi da pynchongchit leh ya ki paidbah da ki rwai na u ma Ram Suchiang wa ki cha tynre na kiwa boon ki chnong.
Discussion about this post