Ka Election ha Shella u man ko leh wow pynemkaam da ki tiar ki tar wow yada yaka rymaw hadooh ki khulom wa em symbe dieñ: CEO

Shillong: U Chief Electoral Officer (CEO) ka jylla u Frederick Roy Kharkongor da ong u wa katkam ka bichaar wei lum yutip, da em kamwa 11 tylli ki thaw thap Vote ha Shella Constituency, kiwa ye u em i maa wa kiwa rap maa, wei kini toh kiwa haap ha ki khappood wa ka ri Bangladesh. Tangwa da ong u wa kamwa da jooh man ha ki por wa da dep, ka Shella toh ka Constituency kawa jai jai wa kawa suk wa saiñ.

Hawa yaklam ynnin ka sngi cha ki laad pathai khubor, u Frederick da ong u wa ka chnat da dep chong yalang ko wa ki heh pulit, wei kamwa man katni, ka Shella man ko kawa chong suk chong saiñ hanlada em 11 tylli ki Polling Station kiwa ye u mih ka huri huri kiwa em ha khappood ka India wa Bangladesh kawa ya chong khleh jaitbru, wei ki bor pulit kamjooh neiliang ki sahep ka Sub-division daw sonteri bha ki ya kitai ki Polling Station.

U CEO da pyntip u leh wa ka sorkar pyrdi da phah ko chi Company ki pulit na ka Central Armed Police Forces (CAPF) wei ka jylla da booh ko 8 kynhun ki Static Surveillance Team (SST) ki wow pait wow lai smat lada em iwon iwon i jia.

Ha iwi tawon i liang wa nadooh wa pynbna ya ka tarik Election chiteiñ samoi ha Shella, ki kyndon ka Model Code of Conduct leh da krehkaam ki nadooh ka 21 tarik u bnai wa da dep. Hawa kylli lada em næ ym em i tyngkheiñ ya ki kyndon ka MCC, u CEO da pyntip u wa wa da em ki tyngkheiñ ya ka aiñ Election da ka chnat ka chait ka khiah tangwa da pynkut noh hadien wa da yoh ya ka jubab kawa biang. Da pyntip u leh wa da em ka ujor wa kiwa mihkhmat da kular ki wow e sñiawbha cha kawi ka skur wei da paan leh ya ka pynche hajrong ini i chah pynbaad wei ya kani leh da pynkut noh hadien wa da yoh ya ka jubab wa biang, nalor kiwi leh ki jia wa malu mala.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U CEO da pyntip u leh wa ha kani ka Election ha Shella, ha ka sien wa nyngkong, ka chnat Election daw pynemkaam ko da ki tiar kiwa yahap waka rymaw kiwa ye u pyut khlem da pynemkaam Plastic de.

Da ong u wa daw pyrchang wow pynemkaam da ki tiar kam ki muna kot, ki muna kse, ki tiar tynre kam ki dieñ ki siej. Ya ki khulom leh u pynemkaam wow chna da kiwa em ki symbe dieñ kiwa ye u thung hadien wa da lut sia u khulom.

Daw e leh ya kini ki khulom em symbe ha kiwa yarap kaam næ ki Volunteer yow man kam chibynta wow rah yaka khubor wa i thmu wow yada ya ka rymaw wei kini ki Volunteer daw pynche wei daw pynsñiawthooh paidbah ki ya kiwa thap Vote.