Shillong: Ka tnat Health and Family Welfare, ka National Health Mission waka yungkrehkaam u District Medical and Health Officer, East Khasi Hills District da pynman ki ya ka pynsñiawthooh paidbah hei yatoh wow yada naka kjut Diarrhoea namo ka kjut pynhiar hei yatoh wa ki khynnah wa 5 snem chapoh kawa tip leh kam ka “Intensified Diarrhoea Control Fortnight” (IDFC) wa pynman ha Ganesh Das Maternal and Child Health Hospital, Shillong ynne ka sngi.
U Meghalaya Additional Chief Secretary, Health and Family Welfare Department, u P.W. Ingty da pyntip u ya ki paidbah kamjooh ki khynnah skur wa em ha kani ka sngi wa kani ka IDFC toh wa da sdang da ka Health and Family Welfare Department, Government of India wei thong yong ka toh wow pynduna yei yap ki khynnah nei kjut pynhiar wei ha kini ki ar tayaw wa sdang nadooh ynne ka sngi 18 hadooh ka 31 tarik toh u pyrchang wow pynsñiawthooh paidbah wow yada na ini i kjut.
U H.M. Shangpliang, Secretary, Health and Family Welfare Department cum Mission Director, National Health Mission da ong u wa kani ka pynsñiawthooh paidbah daw pynman ya ka leh ha waroh ki hospital, ki Health Centre wei daw saam mynkna ya ki dawai ORS wa ki kuli Zinc da kiwa kreh ASHA kiwa daw psiah ha kiwi pa kiwi ki yung ha kini ki ar tayaw.
Da kyntu u leh ya ki paidbah wow krehlang wa ka sorkar yow pynduna yei kjut pynhiar deiwa sñiawthooh chaphang ini i kjut wei kammon wow yada naka yow pynduna yei dooh i mynsien ki khynnah na ini i kjut.
Discussion about this post