Ka District Disaster Management Authority, West Jaiñtia Hills District ynne ka sngi da pynman ko i pynsñiawthooh ya kiwa chong chnong ka Mynthong, Jowai hei yatoh kammon u man kiwa pynkhreh wow yada nei bor pynjæt tympra ha ki bor ka rymaw kamjooh leh ki laad yarap lada jia tyngkhooh.
Hawa klam yahkhmat hajrong ka phang Disaster Management ka D.L. Kharkongor District Disaster Management Officer, da ong ko i bor pynjæt tympra ka rymaw em ki boonjait wei ye ki u wan heiwon iwon i por, kamtæ emkaam u man kiwa pynkhreh yow ye u pynduna i jæt i pra, i yap i mynsoo hawa wan iwon iwon i chah pynthut chah ktah hei bor ka rymaw.
Itæ toh deiwa em chwa ka plan khnang yow ye u pynsmat i rukom krehkaam heiwon iwon i thaw la ha International Level, State Level, District Level, Block Level, Community Level ter ter.
Neitæ da batai wei pynyoo nuksa ko leh yeiwa jia ha ka ri India kam i khih khmi, oor khyndaw wa kiwi ki bor pynjæt tympra ka rymaw.
Ka yung krehkaam u Deputy Controller Civil Defence, Jowai deilang ki staff yong oo hawa pynyoo ya ki laad wow yarap ya i dæ kamjooh u yarap ya kiwi, kyntu u leh wa kat kiwa em hei thaw wa jia toh u man kitæ kiwa yarap wa nyngkong dooh wymtoh u yang hadooh wa poi ki bru sorkar
Deiwa pynkynmoo leh wa ha kini ki sngi lada em ki bru wa ngat hei chah pynjæt tympra ka rymaw smat pathan ki dei chondur te Upload ha ki Social Media hei thaw u e yarap ya ki.
Heijoooh i por leh ong u kani ka e sikai man kawa emkaam bha ha kani ka chnong neibhah kut wa joor u slap ym jooh dam de u em i oor khyndaw kam cha liang Riatsasim.
Da pynrap u leh wa teiñ teiñ i rukom chna yung hi ki bru leh jooh booh i hei maa ya ki marjan, najrong wa boon ki bru wa pyrkhat du yow lait ya i dæ tæ ym pyrkhat de ki ya kiwi.
Neiliang ka H.M.L. Kynta Additional Deputy Commissioner, West Jaiñtia Hills hawa wai ya kani ka e sikai wa ar sngi, ong ko kamwa ki dong ki chnat hi man kiwa nyngkong u e yarap hawa jia i chah ktah ha ka rymaw ngait skem ko leh wa kani ka e sikai u man kawa pynmyntoi heiwa la jia ya tyngkhooh leh da man ki kiwa tipsap u e yarap.
Da emlang leh ha kani ka sngi u M.A. Challam, Additional Deputy Commissioner, West Jaiñtia Hills District, u waheh chnong Mynthong u Lamphrang Pohktai, u Secretary Chnong u Ryum Khonglah wa kiwi.
