Jowai: Ka Rymbai Government Secondary School, Rymbai ynnin ka sngi 8 tarik da pynman ko ya ka One Day Short Term Civil Defence Training Awareness Programme hapoh ka skur nadooh i por 10:00 waje i step hadooh 4:00 waje noh chariñ sngi.
Ya kani ka esikai da pyllai da ka yungkrehkaam Civil Defence, CD & MLHG, West Jaiñtia Hills District hapoh i yahkhmat u Inspector yong ka u I. Khongjoh chirup wa kiwa krehkaam kani ka office.
Ha kani ka esikai da pynyoo ya chiboon ki laad wa kammon u e yarap ya ki bru kiwa mynsoo ha kiwa boonjait hawa khih khmi, wan ka la-ær yong næ kiwi kiwi kiwa pyn mynsoo ya ki bru heiwa ki khynnah ka skur da chimbynta chongshit ki chirup wa kiwa sikai kani ka skur.
Kani ka esikai toh kawa dei kyrpaad ka Headmaster yong ka skur, P. L. Nonglait na kani ka tnat sorkar khnang wa ki khynnah yong ka skur u yoh myntoi ki wei wow ye ki leh u yarap ya kiwi.
Chwa wow kut ka esikai, ka Nonglait da e khublei kyrpang ko ya ka Department CD & MLHG, West Jaiñtia Hills weiwa ong ko yooluti wa ka skur daw yoh chooh chooh ko kam kini ki jait yarap na ka sorkar ki wow pynmyntoi ymtoh du kat ya ki khynnah skur heijooh ipor ya ka chnong hi waroh kawi, da e khublei ko leh ya ki khynnah skur wa kiwa sikai deiwa kyntu ko yei yakræhlang yow ye u e sikai ya kiwi tawon leh ki wa chong chnong ka Rymbai wa ki jan chnong yong ka.
Discussion about this post