Ynne ka sngi ka yung krehkaam u Superintendent of Police, West Jaiñtia Hills da pynman ko ya ka esikai ya ki pulit ka West Jañtia hajrong ka aiñ wow yada ya ki khynnah, namo ka Interactive Session on Juvenile Justice (Care and Protection of Children) Act, 2015.
Ya kani ka esikai da pynman ha Conference Hall kani ka yung krehkaam heiwa ka Principal Magistrate ka WJH, ka Sneha PD Sangma da man ko kam ka bru chemphang hei emlang ki dkhot ka Juvenile Justice Board (JJB), ka V. Hadem wa ka A. Passah.
Chwa wow sdang ka esikai da em ka yalang wa tbian ya kawa da pynlai da ka DSP (C) ka CW Lyngdoh wei da yoh yei klam na u SP ka District, u Bikram Marak wei da wan chimbynta ha kani ka esikai da ki sahep pulit ka District.
Ka Sneha da ban joor ko hajrong ki kyndon kani ka aiñ wei kammon u leh wow yada ya ki khynnah kiwa tyngkheiñ aiñ kamjooh leh ki khynnah kiwa chah jrongkti khlemakor.
Da batai ko wa ya ki khynnah hawa kem ya ki ymye u pynemkaam ya i kyntien Arrest tangwa dei kyntien Apprehend, wei ymye u kdoh hadkari (Handcuff), wei hawa leh ya iwon iwon emkaam wow leh da ka District Child Protection Unit wei wow wanrah ya ki ha ka JJB wow bichaar ya ki.
Chooh chooh da ong ko wa emkaam bha wow pynemkaam ya ki kot ki sla wow pynsakhiat yei rta yong ki wei lada em i artatien emkaam wow yohbor na ka JJB chwa wow leh iwon iwon.
Da ong ko wa ki khynnah kiwa tyngkheiñ aiñ ymye wow Register Case pyrchah ya ki tangwa lada jia wa emkti ki bru wa da heh (palat 18 snem) emkaam wow Register Case du ya kiwa da heh.
Heijooh i por da kyntu ko wa ya i takit toh u ye wow pyndep hapoh 4 bnai.
