Jowai: Ka CSC e-Governance Services India Limited deilang waka Ministry of Statistic and Program Implementation ka sorkar pyrdi da pynman ki yaka 7th Economic Census District Level Training neibynta ki Supervisor wa Enumerator wa wan na kylleiñ ka chnong yong ka District. Ya kani ka esikai da pynman haka 7 tarik uni u bnai ha Deputy Commissioner Conference Hall, East Jaintia Hills, Khliehriat.
Ha kani ka e sikai da yoh yei klam na u Joshua Hegan Lyngdoh uwa man kam u State Head yong ka CSC-SPV, da ong u wa kani toh ka sien wa nyngkong wa ka Economic Census u leh da ki CSC (Common Services Centre) wei da banjoor u wa ha uni u snem u man ko kawa rap phær bha bar ya i por wa da leh nachwa neidaw wa katni daw pynemkaam da ki Mobile App (Android App) ka wow pynsuk bha ya ki wa leh Survey (enumerator).
Da yoh leh yei klam na u B. Mawkhiew, District Statistical Officer wa na u Deputy Commissioner, East Jaiñtia Hills, Khliehriat, uwa da pynsñiaw ya i yaroh ya ki CSC VLE (Village Level Entrepreneur) ya ki kaam wa ki leh ki ha kylleiñ ki chnong ka District kawa pynsuk bha ya ki paidbah yong ka Distict waroh kawi khamtam ha ka juk wa katni wa ka Computer, ka Internet da psiah ko ha waroh ki kaam wa leh i wei da sneiñ kyntu u leh ya ki Enumerator wa Supervisor wa toh u leh bha ya ka kaam Survey Economic Census wa yong uni u snem kamwa ka sorkar pyrdi da pynkhamti ha ki.
Kiwa wan e sikai ha kani ka sngi toh u Joshua H. Lyngdoh, State Head CSC-SPV, ka Marylies Nongrum kawa man ka Senior Statistical Officer, NSSO, Shillong kawa batai bniah bha chaphang ka Economic Census, u Helpman Phawa waka Regina Sympli, District Manager, CSC E-Governance Services India Limited.
Kiwa wan chimbynta ha kani ka e sikai da em ki kamwa 80 ngut wei da pynsñiaw ki yei sñiawhun ya kani ka esikai kawa daw yarap wow pyndep ya ka Economic Census Survey.
Discussion about this post