Ka final ka Jingiaseng Samla Balang Presbyterian, Mookyndur Football Tournament

Jowai : Ka Jingiaseng Samla Balang Presbyterian, Mookyndur ynne ka 5 tarik da pynyaleh ko ya ka yakhun khaddooh (Final) yong ka 2nd Football Knockout Tournament wa da pynman ko nadooh ka 13-01-16.

Ha kani ka tournament da wan chimbynta 16 tylli ki dhab wei da yaleh mar 9 ngut chilliang wei 35 minit chi kylla.

Ha chwa u sdang ka yahun da em leh i kynmo warom ya u (L) P. A. Sangma wa khlad ynnin deiwa suki ki paidbah chi minit.

Da wan wai ya kani ka yakhun Final da u ma E. Pohchen, In-Charge Ummulong Police Outpost uwa yaroh ya ka chnong Mookyndur deiwa ong wa nadooh wa pait u ya ka Ummulong ym jooh em iyi iyi i ujor naka chnong Mookyndur wa pynyoo wa kiwa pyllai chnong kamjooh kiwa chnong chnong toh ki wa chong suk chong saiñ.

Related posts

Poi noh ka Baby League ka East Jaiñtia cha wakut

May 10, 2025

District Cricket League: Jop ka Phramer ya ka Khliehtyrshi

May 10, 2025

Da yaroh u leh ya ka chnong wa pynman ko ya kani ka tournament yow pynmih poisa yow kyrchaan ya ka Youth Center Building yow lait ki khynroo khylood u lai cha ki luti wa lait.

Ha kani ka yakhun khaddooh da yachem ka Man-I SC pyrchah ya ka Chirup Deilang FC.

Ha ka kylla step ka yalehke man ko ka wa ya thaiñ bha heiwa waroh ar ki dhab da sai ki ya ki buit ki budia yow pynkhih chwa ya ka jaar.

Waroh ki ar dhab da yoh ki kattu katni ki lad wow thap chwa ya ka kool wa nyngkong tangwa da kut ka kylla step khlem em wa thap tang chi kool leh.

Ha ka kylla miet ha ka minit wa 14 ka Chirup Deilang da yoh ko u thap ya ka kool lyngba u Damehun Syih.

Kani ka kool da neh ko hadooh wa kut wei da yoh ka Chirup Deilang u rah ya ka naam wa jop.

Da saam leh ha kani ka sngi ya i naam ‘Top Scorer’ cha u Mon Dkhar na ka Chirup Deilang uwa yoh u thap 5 kool. Yei naam ‘Best Goalkeeper’ da yoh da u Denis Phawa na ka Chirup Deilang.

Kam kawa jop ka Chirup Deilang da yoh ko leh u rah ya ka song poisa wa T. 20,000 katwa ka Man-I da yoh ko T. 10,000.