Jowai: “Nadooh wa mih ka GST da mih boon i kulmar ha ki yaaw ki hat hadooh wa da em wa pynkudor ya ki dor jhoor, i dor doh, i dor dakha hadooh wa pynku bai kari,” da ong u P.K. Sen uwa man kam u Superintendent of CGST, Shillong ynne ka sngi ha ka yalang pynsñiawthooh paidbah chaphang ka GST wa pynman ha District Library Auditorium, Jowai.
Da ong u wa ki mar rep wa dai cha yaaw, nadooh ki ki jhoor ki doh ym em haap ki hapoh ka GST wei i dor kini ki jait mar daw hiar ki neibhah i bai kit ya ki na kawi ka jylla cha kawi da hiar dor i nadooh wa pynwiar ya ka khrong dan chwa u psiah na kawi ka jylla cha kawi nadooh wa pynmih ya ka GST.
Chooh chooh da pynche paidbah u wa i dor MRP wa da thoh ha ki mar wa dai cha ki dukan, ymtoh u ye u dai palat yeiwa da booh deiwa kam toh haap su GST.
Ha kani ka yalang pynsñiawthooh paidbah da yaklam leh chaphang kiwa khayi khian kiwa yoh nong hapoh T. 75 Lak chisnem heiwa ki ye ki u jied da ka Composition Scheme wei ym emkaam u leh ki ya kiwa boon kamwa haap leh kiwa kamai da ki Klur chi snem.
Kiwa ye u jied ya kani ka Composition Scheme ye ki u khayi du hapoh ka jylla wei ha ka Bill yong ki haap thoh ki Bill of Supply ymye ki u e da ka Tax Invoice.
Ya kiwa pynmih mar haap su dan ki du 2% heiwa ka CGST man ko 1% ka SGST man ko 1%. Kiwa khayi pateiñ ya ki mar won haap su ki 1% heiwa 0.5% toh yong ka CGST katwa 0.5% toh ka SGST. Kiwa khayi won ya ki jait dih lait na i kiad haap su ki 5% heiwa 2.5% toh ka CGST wa 2.5% SGST.
Ki tre Restaurant ym ye ki u chim ya kani ka Composition Scheme.
Hei yatoh won wa em kiwa khayi wa chah kyntait ki neidaw wym em GST Registration Number ki heipor wa li thied mar ki, da pyntip wa ka sorkar ya kam kini ki kaam ya uwa dai kamjooh uwa thied ym kheiñ ya ki hapoh ka GST wei ye hi u leh ya ini yow lait kiwa khayi wa dang khian u yap khih.
Discussion about this post