Ka High Court pynsangeh ko du wow thung moopood ym toh yaka soskular: Prestone

U Symbood Montri Rangbah ka jylla, u Prestone Tynsong da ong u wa ka High Court ka Meghalaya ym em pyndam lane pynsangeh ko yaka soskular Memorandum of Understanding (MoU) wa da ya soi hapyrdi ka Meghalaya waka Assam hawa yatoh wa i pynbait ya u pood u ang ha ki 6 tylli ki thaw haka thup wa nyngkong namo ka ‘First Phase’.

Ini i ong u Prestone toh hadien wa ynni, ka High Court da pynmih hukum ko wow pynsangeh yei thung ya ki moopood hadooh wa ka yung bichaar u chong bichaar biang ko ha ka 6 tarik Thohlakhmi (Feb) 2023. Ini i rai yong ka High Court toh hadien wa da pdiang ya ka PIL yong ki khlieh synchaar yong ki chnong ha khappood pyrchah ya ka soskular wa da yasoi da ki ar sorkar hawa yatoh wa i pynbait ya u pood u ang.

Hawa yaklam ynne ka sngi, u Prestone da ong u wa ka High Court da phah ko ya ki ar jylla wym pu toh u thung ya ki moopood, heiwa da khana u wa ka sorkar ym pu poi ko cha i thung ya u moopood ha ki 6 tylli ki thaw wa dadep pynbait, neibhah daw hap sdang ya ka sorjamin da ka chnat Survey of India ryngkat ki ar jylla.

Da ong u wa kani toh ka Constitutional Boundary, wei hadien wa da dep ya ki kaam sorjamin da ka Survey of India, hap wow dro dur biang ya ka Map yong ka Meghalaya wei kamjooh yong ka Assam.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Hawa kylli, da ong u wa ya katni ka sorkar ym pu ong ko iyi iyi, tangwa da hap yang biang yei bichaar wa daw man haka 6 tarik u Thohlakhmi, wei da khana u wa ka sorkar daw pynkhreh ko yei jubab lyngba ka Affidavit ha kawa yatoh wa katai ka kaam, neibhah i yong sakhiat ym em wa ye da uwon uwon wow lai dro bait ya ki pood namo ka Map khlem da ya pynbait lang ki ar jylla, wei da bynrap u wa kani toh ka mat yong ka sorkar India ka wow tipmit ya u pood yong ka Meghalaya waka Assam.

U Prestone da ong u wa kani ka hukum yong ka High Court wym pu toh wow thung ya ki moopood kawa man kawa bha chiboon, boi ka Assam mut ko wow thung ya ki moopood khlem ki kyndon wa da yakut hapoh ka soskular.

Hawa kylli chooh chooh, u Symbood Montri Rangbah da ong u wa ka rai yong ka High Court ym ktah ko yei yaklam pynbait pood wa ka Assam ha ka bhah kawa ar, neibhah ka yaklam dang lai bait ko wei da dep leh wow chna ya ki Regional Committee.