Neidaw wa joor wa boon kiwa yoh COVID-19 ha East Khasi Hills District kamjooh wa da sdang dap ki pyllong ki Hospital, ka District Magistrate, East Khasi Hills District ha ka hukum wa pynmih ynne ka 15 tarik hapoh ka Section 144 CrPC deilang wa ka Regulation 3 ka Meghalaya Epidemic Diseases, COVID-19 Regulations, 2020 da pteiñ ko ya ka Curfew ha East Khasi Hills District nadooh 5:00 waje i step ka 17-05-21 hadooh 5:00 waje i step ka 24-05-21.
Ka hukum Curfew da khang wow pynman ya waroh ki jait yalang wa kynthup ya ki yalang seiñhima, niam, paidbah, ki e sikai (Training) wei da khang leh yei lai i wan ki kari lait noh kitu kiwa leh ya ki kaam wym hoi u dam (Essential Services) wa kynthup ya ki kaam wa yatoh wa i chait i khiah.
Da khang leh yei pisah chapoh ka East Khasi Hills kamjooh wow mih napoh yong ka East Khasi Hills District.
Waroh ki yaw wa heh hapoh ka East Khasi Hills District wa kynthup ha Shillong daw man ki kiwa khang. Ki marbaam wa emkaam daw dai lyngba ki dukan wa em ha ki jar jiar ki dong katkam wa pynbait ki Incident Commander, Block Development Officers, Sub Divisional Officers (Civil) deilang wa ki Waheh Chnong wa CCMT. Ki dukan Wholesale daw chah u wai ki katkam ka hukum wa da pynmih ha ka 14 tarik uni u bnai.
Ki Bank wa Post Office u chah wow wai ki deiwa pynduna ya ki bru wakreh katwa ki yung krehkaam ka sorkar pyrdi wa sorkar jylla da pynlait na ka hukum ka Home (Political) Department, ka sorkar Meghalaya wei u wai ki deiwa em ki wakreh 30% wei waroh kini hap ki wow khang chwa ka 4:00 waje i sngi katwa ki yung krehkaam ki bru samen u man ki kiwa khang.
Ki Restaurant, Cafe wa kiwa leh ya ka Food Delivery Services u chah wow leh ki ya ka Home Delivery Service deiwa yoh bor na ka yung krehkaam ka District Magistrate, East Khasi Hills District. Ini kynthup ki ya ki thaw chet neibynta ki Quarantine Centre, ki bru wa em COVID- 19 Duty wa ki manyung wa hap wow leh ya ka Home Isolation katkam ka hukum wa pynmih ha ka 7 tarik uni u bnai.
Kiwa leh ya ka E-commerce wa kiwi ki Home Delivery Service u chah wow leh ki yei kaam ki deiwa bood thij yei kyndon wa pynmih da i yung krehkaam ka District Magistrate, East Khasi Hills District.
Ki Bars wa ki Takeaway Counter u man ki kiwa khang.
Ki kaam chna yung kiwa em ki wakreh pyn hei thaw wa chna wei ym emkaam wow wanrah bru na kiwi ki thaw u chah u pyndep yei kaam deiwa pyntip chwa cha ka District Magistrate, East Khasi Hills District lane cha ki Block Development Officer katwa emkaam.
Waroh ki yalehke Sports toh kiwa ym chah wow pynman.
Ki yung maneblai toh u man ki kiwa khang, ym chah wow pynman bia heipor wa em ka Lockdown katwa ki yalang hawa em i yap bru u chah du 15 ngut donhi ki bru deiwa yoh bor chwa.
Ki kaam wa pynlait naka hukum Curfew toh ki yong i chait i khiah wa kynthup yei lai chim tika, ki kaam yong ka Food Corporation of India, ki kaam bordiñ, ki kaam wa yatoh wow pynpoi um, Security, Police & Armed Forces, Municipal, Fire & Emergency Services, National Informatics Centre and Telecommunication Services, i lai i wan ki mar wa emkaam, Print & Electronic Media, ki kaam rep ha ki thaw palatsor, ki kaam MGNREGA ha ki thaw palatsor, NARI/ 1917iTEAMS, ki Officer wa ki wakreh ki Corona Care Centre, waroh ki bru (Officials) wa lai ya ki COVID-19 Duty, Shillong Municipal Board Essential Services, Shillong Cantonment Board Essential Services, Pharmacies, LPG Distributors, Petrol Pumps, waroh ki Directorates wa em hapoh ka Directorate of Health Services, Directorate of Food, Civil Supplies wa Consumer Affairs, Directorate of Information and Public Relations, Office u Director General of Police wa NHIDCL.